‘Në shërbim të paqes ndërmjet armëve’: është përkufizimi i Benediktit XVI në audiencën
me pjesëmarrësit në Takimin ndërkombëtar të kapelanëve ushtarakë.
(26.10.2006 RV)Si mund të realizohet shërbimi ndaj paqes ndërmjet armëve: për
këtë foli Benedikti XVI duke pritur sot paradite në audiencë pjesëmarrësit në Takimin
ndërkombëtar të kapelanëve ushtarakë, shoqëruar nga kardinali Gjovani Batista Re,
prefekt i Kongregatës së ipeshkvijve, i cili kryeson punimet, që vijojnë deri nesër
në Vatikan. Vlera e njeriut dhe vlera e paqes – kujtoi Papa – janë shtyllat e
asistencës shpirtërore të ushtarakëve, ashtu siç nënvizoi 20 vjet më parë Gjon Pali
II në Kushtetutën Apostolike Spirituali militum curae, në dritën e Koncilit
II të Vatikanit e duke pasur parasysh ndryshimet që kanë të bëjnë me Forcat e armatosura
dhe me misionin e tyre në planin kombëtar e ndërkombëtar. Por kohët e reja krijojnë
sfida të reja – theksoi Papa dhe, duke rikujtuar Kushtetutën konciliare Gaudium
et spes, theksoi se ata që kryejnë shërbim ushtarak, mund të konsiderohen si njerëz
që i shërbejnë sigurisë dhe lirisë së popujve, sepse po ta kryejnë si duhet detyrën
e tyre, bashkëpunojnë në mbrojtjen e stabilitetit e të paqes. Prej këndej, porosia
e Papës, që kapelanët ushtarakë të jenë specialistë e mësues të vërtetë të doktrinës
që mëson e praktikon Kisha në përpjekjen për sigurimin e paqes në botë. Tema e
paqes – shpjegoi Ati i Shenjtë – përbën një aspekt themelor të doktrines shoqërore
të Kishës, me rrënjë tepër të lashta, që vijuan të fuqizohen në shekullin e fundit
me thirrjet e vazhdueshme për paqen. Këto thirrje kanë ndikuar në kulturën perëndimore,
duke promovuar idealin që Forcat e armatosura të vihen plotësisht në shërbim të sigurisë
dhe të lirisë së popujve. Por nuk ndodh gjithnjë kështu: “Për fat të keq, interesa
të tjera – ekonomike e politike – të nxitura nga tensionet ndërkombëtare, bëjnë që
kjo prirje ndërtimtare të ndodhet përballë pengesave e vonesave, gjë që shihet qartë
edhe në vështirësitë që ndeshen në procesin e çarmatimit”. Kisha – tha në përfundim
Papa – do të vijojë, brënda botës ushtarake, të ofrojë shërbimin e vet për të formuar
ndërgjegjet, e sigurtë se Fjala e Zotit, e vënë me dashuri të krishterë në shërbim
të së vërtetës, nuk do të mungojë të japë frytin e vet në kohën e duhur.