Të favorizohet ndjohja ndërmjet popujve për të luftuar paragjykimet fetare: fjalim
i imzot Etore Balestreros në OSBE.
(17.10.2006 RV)Të nxitet njohja ndërmjet popujve, për të luftuar paragjykimet,
intolerancën dhe diskriminimin kundër të krishterëve dhe besimtarëve të feve të tjera.
Këtë theksoi imzot Etore Balestrero, kryetar i delegacionit vatikanas në takimin vjetor
të OSBE-së (Organizatës për Sigurimin dhe Bashkëpunimin në Evropë), mbajtur në Varshavë.
Në takim morën pjesë delegatët e 56 vendeve anëtare të OSBE-së, të cilët diskutuan
për vënien në jetë të impenjimeve që kanë marrë në mbrojtje të të drejtave të njeriut.
Sot –vërejti imzot Balestrero - tepër shpesh fetë manipulohen, madje edhe keqkuptohen
si shkaktare për lindjen e problemeve, në sa duhen konsideruar si mjet për zgjidhjen
e problemeve që ekzistojnë ndërmjet kulturave e qytetërimeve. Por – vijoi prelati
– pa njohjen reciproke, nuk mund të bëhet fjalë për kurrfarë bashkëpunimi ndërmjet
kulturave, feve dhe identiteteve etnie. Bashkëpunimi kërkon dialog e dialogu është
vetëm hapi i parë për gjetjen e një terreni të përshtatshëm, mbi të cilin mund të
vendoset bashkëpunimi i përhershëm. Duke kujtuar perspektivën e përvijuar qartë
nga Benedikti XVI, sipas të cilës feja nuk duhet të bashkohet me dhunën, por me arsyen,
imzot Balestrero theksoi me forcë se OSBE-ja duhet të punojë që fetë të mos manipulohen
nga ndjekësit e strategjisë së tensionit. E, në këtë drejtim, një përgjegjësi
të dorës së parë kanë sistemi edukativ dhe mjetet e komunikimit, që duhet të përpiqen
t’i shmangin stereotipet, shtrembërimet, intolerancën dhe nënvleftësimin e vazhdueshëm
të fesë e të kulturës, duke pasur posaçërisht parasysh edukimin e të rinjve – tha
në përfundim kryetari i delegacionit të Vatikanit.