Mesazhi televiziv i Benediktit XVI për Ditën e Gjon Palit II në Poloni.
(16.10.2006 RV) Sot, në përkujtim të 16 tetorit 1978, kur kardinali Karol Vojtila
u zgjodh pasadhës i Shën Pjetrit, në Poloni u kremtua Dita kushtuar Gjon Palit II. Me
këtë rast Papa Benedikti XVI i drejtoi atdheut të Papës Vojtila këtë mesazh: Të
dashur vëllezër e motra, Sot, 16 tetor, ditë në të cilën përkujtojmë zgjedhjen
e Karol Vojtilës në Selinë e Shën Pjetrit, dëshiroj të bashkohem shpirtërisht me juve
në lutjen e falënderimit për Papninë e Paraardhësit tim të madh. Pranojeni, pra, përshëndetjen
time të përzemërt! Së bashku me juve, dëshiroj të rikthehem me kujtesë në ditën
e paharrueshme të zgjedhjes së Tij në Selinë e Shën Pjetrit. Më ushton ende ndër veshë
jehona e fjalëve të tij, të përvujta, të urta e plot me përkushtim, kur iu përgjigj
pyetjes në se e pranonte zgjedhjen e bërë nga kardinajtë: “Duke bërë dëgjesën në fe
përpara Krishtit, Zoti tim, duke ia besuar veten Nënës së Krishtit e të Kishës, -
i vetëdijshëm për vështirësitë e mëdha – pranoj!”. E kam parasysh figurën e tij, të
fortë e të qetë, në lozhën e Bazilikës së Shën Pjetrit, kur dha për herë të parë Bekimin
Urbi et Orbi – Romës e Botës, duke ia besuar veten Zojës së Bekuar dhe të gjithë atyre
për të cilët do të kujdesej si bari e prijës në të gjithë botën. Nuk e kam harruar
kurrë thirrjen e tij profetike: “Mos kini frikë! Hapjani portat Krishtit!”. Falënderoj
Zotin që me këto pamje në zemër munda të kaloj më se dy dhjetvjeçarë pranë tij, duke
gëzuar mirësinë e miqësinë e tij e që sot mund ta vijoj veprën e nisur nën vështrimin
e tij mbrojtës nga Shtëpia e Atit. Falënderoj Zotin për jetën e tij të shkrirë për
dashuri të Krishtit e të njerëzve, që pasuroi ngjarjet e mbarë njerëzimit me hirin
e Shpirtit Shenjt, në frymën e vëllazërisë e të paqes. Së fundi falënderoj Zotin për
dëshminë e vuajtjes së tij të bashkuar me mundimet e Krishtit deri në vdekje – dëshmi
që na jep fuqi për të jetuar e na e forcon shpresën për të gëzuar një ditë në amshim. Sa
e dashur ishte për Gjon Palin II Kisha në Poloni! Sa herë e shprehu këtë ndjenjë.
E deshi si Nënë që i kishte dhënë jetën në fe dhe e kishte rritur në dashurinë e Krishtit
e të vëllezërve. Por e deshi edhe si bashkësi përherë të lidhur ngusht me barinjtë,
që në të kaluarën kishte vuajtur aq shumë nga persekutimet e ndryshme, duke i qëndruar
gjithnjë besnike vlerave ungjillore. Sa lutej e sa përpiqej që Polonia të fitonte
lirinë. E kur kjo u arrit, ai nuk pushoi s’u kujdesuri që bashkatdhetarët e tij të
mësoheshin për ta jetuar lirinë si bij të Hyjit e jo si bij të kësaj bote, duke e
ruajtur fenë. I vetëdijshëm për këtë trashëgimi që Ai i la Kishës në Poloni, erdha
këtë vit ndërmjet jush me thirrjen e Shën Palit: “Qëndroni të fortë në fe!” Me këtë
rast dëshiroj t’ju falënderoj përsëri për dëshminë e fesë së gjallë, që dhatë në kohët
e forta të Shpirtit Shenjt e që e gëzoi zemrën time. I lutem Zotit ta ruajë fenë e
breznive të ardhshme të kësaj toke fisnike. Ju falënderoj në mënyrë të posaçme për
të gjitha shenjat e bashkimit plot dashuri me Papën që pasoi bashkatdhetarin tuaj
të madh. Ia besoj mbështetjes suaj shpirtërore shërbimin tim për Kishën e për Botën. Së
fundi në këtë ditë falënderoj me gëzim të gjithë polakët. Kujtimi i Gjon Palit II,
studimi i veprës së Tij, ju afrofshin gjithnjë më shumë tek Krishti. Qofshin nyje
bashkimi në kujdesin e përbashkët për ardhmërinë e Kishës e të Kombit. Ju bekoj me
gjithë zemër: në emër të Atit e të Birit e të Shpirtit Shenjt. Është hera
e gjashtë që në Poloni kremtohet Dita e papës, themeluar pas shtegtimit të 1999-tës
të Gjon Palit II në atdhe.