Shenjtorët e javës së ardhshme sipas Kalendarit kishtar.
(15.10.2006 RV) Sot Kisha
katolike kremtoi të dielën XXVIII të kohës gjatë vitit kishtar. Përkujtoi edhe Shën
Terezën e Jezusit, virgjër, doktoreshë e Kishës, karmelitane e zbathur. Nesër,
e hënë, do të kremtojë festën e Shën Edvigës, dukeshë e Polonisë, rregulltare,
të Shën Margeritës Alakok, virgjër e Vizitacionit dhe të Shën Gjerardo Maielës, vëlla
laik redentorist. Festa e tyre na kujton se feja na ndihmon ta njohim e ta lexojmë
jetën në këndvështrimin e Hyjit, duke u mbështetur plotësisht në Të e duke e bekuar
në amshim emrin e Zotit. Të martën do të përkujtohen Shën Injaci i Antiokisë,
ipeshkëv e martir dhe Shën Pjetër Kasani, meshtar skolop, që ia dhuruan gjithë jetën
Jezusit, i cili u mësoi se nuk janë sjelljet, as pamja e jashtme, që do të na shpëtojnë.
Ajo që vlen me të vërtetë është drejtësia dhe dashuria për Zotin, i cili lind në zemrën
tonë. Shën Luka ungjilltar, mjek, pajtor i artistëve, që do të kremtohet të
mërkurën e ardhshme, na kujton se miqtë e Zotit e kumtojnë kudo në botë mbretërinë
e tij. Të enjten e ardhshmeKisha do të përkujtojë Shën Gjonin de
Brebëf e Isak Joges, meshtarë - dhe shokët e tyre jezuitë, martirë kanadezë si dhe
e Shën Palin e Kryqit, themelues i pasionistëve. Festa e tyre liturgjike na kujton
se Zoti do të kërkojë llogari për gjakun e derdhur padrejtësisht, për peshën që ngarkojmë
mbi shpinën e të tjerëve, për çdo gënjeshtër që themi në dobi të vetvetes e në dëm
të të afërmit. Në se duam të hyjmë në mbretërinë e qiellit, duhet të jetojmë në përkim
me Ungjillin, duke iu kundërvënë çdo shfaqjeje të hipokrizisë. Në përkujtimin
e Shën Laurës, Shën Irenës dhe Shën Maria Bertilës Boskardin, virgjër - të premten
e ardhshme, Kisha na kujton se Zoti nuk harron as harabelin më të vogël dhe e
di deri numrin e flokëve që kemi në kokë. Të gjithë jemi në zemrën e Atit qiellor. Të
shtunën do të kremtohet festa e Shën Gasprit të Bufalos, meshtar, themelues
i Misionarëve të Gjakut paçmueshëm të Jezu Krishtit, që na kujton se lumnia më e madhe
e Zotit është njeriu i gjallë, në të cilin banon Shpirti i Tij i Shenjtë.