Ngushëllimet e Papës për vdekjen e kardinalit Dino Monduci, që i desh aq shumë shqiptarët.
(13.10.2006 RV)Dje, pas një sëmundjeje të gjatë, ndërroi jetë në moshën 84
vjeç, kardinali Dino Monduci, diakon i Shën Sebastianit në Palatin dhe prefekt nderi
i Shtëpisë Papnore. “Në shërbim të katër papëve me përkushtim të jashtzakonshëm,
kardinali i ndjerë e kreu detyrën e mjeshtrit të dhomës me shkathtësi e urti”: kështu
e kujton Papa Benedikti XVI në telegramin e ngushëllimit drejtuar familjarëve, duke
theksuar aftësitë e veçanta të të ndjerit në organizimin e audiencave papnore e të
shtegtimeve baritore në Itali. Salikimet e Kardinalit të ndjerë do të kremtohen
të hënën e ardhshme në bazilikën e Vatikanit. Emrin e kardinalit Monduci e njohin
mirë shumë shqiptarë, që nga personalitetet më të larta kishtare e politike, tek njerëzit
më të thjeshtë. Ai i shoqëroi tek Papa Gjon Pali II meshtarët e ipeshkvijtë e parë
shqiptarë, që shkelën në Vatikan pas shembjes së perdes së hekurt. Po ai, ambasadorin
e parë të Republikës së Shqipërisë pranë Selisë së Shenjtë, Willy Kamsin dhe kardinalin
e parë shqiptar, Mikel Koliqin. U priu më pas edhe personaliteteve të ndryshme politike
shqiptare, që trokisnin në derën e Papës për të kërkuar ndërmjetësim ndërkombëtar,
duke dëshiruar gjithnjë që këto takime të ndikonin për një ardhmëri më të mirë të
vendit të vogël ballkanik. E ndjente thellë vuajtjen e popullit shqiptar dhe e çmonte
shumë madhështinë e Kishës së martirizuar së bashku me grigjën e vet. I respektonte
shqiptarët aq, sa kur shkelnin në Vatikan, bënte çmos ta ndjenin veten si në shtëpinë
e tyre. Me këtë frymë e me këto dëshira e shoqëroi Papën Gjon Pali II në shtegtimin
e tij historik të 25 prillit 1993 në Tiranë e në Shkodër, duke ruajtur nga ky shtegtim
kujtime të paharrueshme që e thelluan më tej afërsinë dhe respektin për shqiptarët.
Meriton prandaj kujtim e lutje për pushimin në paqe të shpirtit të tij të ndritur.