Sot Papa priti në audiencë private kryeministrin polak Kacinski: në qëndër të vëmendjes,
mbrojtja e jetës dhe e familjes, liria fetare dhe dialogu ndërmjet kulturave.
(12.10.2006 RV) Takimi i Papës me kryeministrin polak Jaroslav Kaçinski, që
u mbajt në bibliotekën apostolike, zgjati 40 minuta. Në qëndër të vëmendjes gjatë
bisedimeve ishin kryesisht mbrojtja e jetës, e familjes, liria fetare dhe dialogu
ndërmjet kulturave. Udhëheqësi polak i dhuroi Atit të Shenjtë një skulpturë qelqi
të monumentit të kompozitorit të shquar polak, Frederik Shopen, ndërsa Papa i dhuroi
mysafirit medalje të papnisë. Si përfundoi biseda private, u pritën në bibliotekë
edhe anëtarët e delegacionit që shoqëronte kryeministrin polak. Ndërmjet tyre, ministrja
e jashtme, Ana Fotiga dhe ambasadorja polake pranë Selisë së Shenjtë, Hana Shoka. Më
pas kryeministri Kaçinski u takua edhe me kardinalin Bertone, sekretar i Shtetit të
Shenjtërisë së Tij. Para se të ngjitej në apartamentin papnor, kryeministri Kacinski
përshëndeti kardinalin e moshuar polak, Andrei Deskur, të cilit i dorëzoi një titull
nderi. Së fundi zbriti në kriptën e Vatikanit, për t’u lutur pranë varrit të Gjon
Palit II. Pas audiencës me Benediktin XVI, kryeministri Kacinski shkoi në ambasadën
polake pranë Selisë së Shenjtë, ku i dorëzoi dy tituj nderi ish-sekrtretarit të Shtetit
të Vatikanit, kardinalit Angjelo Sodano dhe ish-drejtorit të Sallës vatikanase të
Shtypit, Joakin Navarro–Valls për shërbimin e tyre të gjatë e fisnik pranë Papës
Gjon Pali II.