Vendimi i Papës për të mbledhur sinodin me temë Fjalën e Zotit, u prit me gëzim nga
Kisha katolike. Koment i kardinalit Karlo Maria Martini.
(11. 10.2006 RV)“Vetëm ai që e dëgjon me vëmendje të madhe Fjalën e Zotit,
mund të bëhet pastaj kumtues i saj, sepse ajo që duhet t’u mësojë të tjerëve, nuk
është dituria e vet, por dituria e Zotit”. Këtë e ka ripohuar disa herë Papa Benedikti
XVI i cili, pak ditë më parë, shpalli Asamblenë e 12-të të përgjithshme të zakonshme
të sinodit të ipeshkvijve, me temë: “Fjala e Zotit në jetën dhe në misionin e Kishës”,
që do të mbahet në Vatikan nga data 5 deri më 26 tetor 2008. Sinodi ka për qëllim
të ritheksojë rëndësinë themelore të Fjalës së Zotit e, prej këndej, risimin e jetës
së Kishës, posaçërisht në predikim, katekizëm, teologji, përshpirtëri e në rrugën
ekumenike. Papa i fton të gjithë besimtarët ta lexojnë rregullisht Biblën sepse,
siç thotë Shën Jeronimi, “kush nuk e njeh Shkrimin Shenjt, nuk njeh Krishtin”. Por,
si e priti shpalljen e sinodit kardinali Karlo Maria Martini, të cilin Papa Benedikti
XVI e quan mësues të Fjalës hyjnore? Ta dëgjojmë vetë kryeipeshkvin e nderit të Milanos
në mikrofonin e Radios sonë: Përgjigje: - Kjo mbledhje e sinodit më gëzon pa masë,
sepse më kujtohet se që nga sinodet e para universale, në të cilat kam marrë pjesë
si kryeipeshkëv i Milanos, që nga fillimi i viteve ’80, kur në përfundim të sinodit
na drejtohej pyetja “ç’argument propozoni për sinodin e ardhshëm?”, unë ngulja këmbë
gjithnjë mbi temën e Fjalës së Zotit. Mund të them, prandaj, se kam dëshiruar gjithnjë
që Fjala e Zotit të bëhej argument i një sinodi. Më në fund shikoj se Papa Benedikti
XVI e ka pasur parasysh dëshirën time, të cilën e kam shprehur edhe në raste të tjera
publike. Jam tepër i kënaqur, prandaj, që Papa zgjodhi këtë temë e besoj se Kisha
do të ketë shumë përfitime prej saj. Pyetje: - Hirësi, në ç’mënyrë Fjala
e Zotit mund të bëhet mjet i privilegjuar për risimin e Kishës? Përgjigje:
- Kisha lind nga fjala e Zotit, kuptimi i fundit i së cilës është vetë Fjala e
Hyjit, është Fjala e mishëruar, Jezu Krishti. Është Fjala e profetëve, Fjala e apostujve
e, së fundi, Fjala e shkruar në Bibël. Kisha lind nga kjo Fjalë e prandaj edhe përtrihet,
rilind sa herë që kthehet tek kjo Fjalë. Posaçërisht Fjala e Shkrimit Shenjt është
pikërisht në duart e Kishës, që Kisha ta ketë sa më pranë e të përtrihet nga kjo afërsi.
Në të vërtetë, kjo fjalë e Zotit, që na çon te vullneti i vetë Hyjit, kjo dëshirë
e Hyjit për të komunikuar me ne, na tregon edhe cili është plani i Zotit, ç’dëshiron
Zoti nga ne, ç’pret nga Kisha, cila është detyra jonë, cila është ardhmëria jonë.
Kështu Kisha rinohet vazhdimisht, duke pirë në burimin e Fjalës së Zotit, ashtu si
përtërihet duke u ushqyer me Eukaristinë. Pyetje: - Pra, ju mendoni se
ka ardhur çasti kur Kisha duhet të rikthehet tek ushqimi i Fjalës së Zotit? Përgjigje:
- Po, sigurisht. Këtë e ka thënë Koncili II i Vatikanit, që na nxit të ushqehemi
më shumë me Fjalën e Zotit – gjë që ka ndodhur edhe me risimin liturgjik – por i nxit
edhe laikët të ushqehen çdo ditë me Fjalën e Zotit e të mësohen për t’u lutur me këtë
Fjalë. Kjo duhet vënë vazhdimisht në jetë, sepse duhet kohë që të realizohet kjo dëshirë
e Koncilit. Pyetje: - Sinodi do të mbahet në tetorin e vitit 2008 por ju,
që e keni dëshiruar këtë temë, sigurisht e merrni me mend ç’ udhëzime baritore mund
të dalin nga ky takim, nga ky ballafaqim… Përgjigje: - Duhet parë ç’ probleme
do të shtrojë konkretisht Papa. Gjithsesi mua më duket se është e rëndësishme të nisemi
nga Dei Verbum, dokument themelor mbi bazën e të cilit Kisha ka shprehur bindjen e
vet për Fjalën e Zotit. Do të më dukej diçka shumë e bukur të shqyrtohej me vemendje
kapitulli VII I Dei Verbum, dmth kapitulli që tregon ç’bën Kisha me Fjalën e Zotit,
si ushqehet Kisha prej saj në teologji, në katekizëm, në liturgji e pastaj, mbi të
gjitha, fragmenti të cilin e kujton vazhdimisht Papa Benedikti XVI. Është fragmenti
që flet për Fjalën e Zotit në jetën e të krishterëve, të cilët duhen mësuar të meditojnë
mbi Fjalën me atë që sot quhet Lectio Divina, dmth të mësohen për t’u lutur duke u
nisur prej saj. Sinodi duhet t’i shqyrtojë gjithë këto probleme, duhet t’i përgjigjet
pyetjes si e kemi vënë në jetë Dei Verbum, si e jetojmë në bashkësitë tona atë që
njihet me merin ‘Lectio Divina’, dmth si i shfrytëzojmë tekstet biblike, duke i lexuar
e rilexuar, gati duke i ripërtypur. Prandaj besoj se do të jetë një çast tepër i rëndësishëm
për historinë e për jetën e Kishës.