Інаўгурацыя навучальнага года ў сэмінарыі ў Пінску
2 кастрычніка 2006 г. адбылася ўрачыстая інаўгурацыя новага навучальнага года ў Міждыяцэзіяльнай
вышэйшай духоўнай семінарыі імя святога Тамаша Аквінскага ў Пінску. Урачыстасць распачалася
а 12-й гадзіне супольнай малітваю ў семінарскай капліцы. Пасля Св. Імшы, якую
целебраваў кардынал Казімір Свёнтэк, традыцыйным студэнцкім спевам Gaudeamus
у актавай зале распачалася сустрэча з нагоды інаўгурацыі новага 2006/2007 навучальнага
года. Прэфект семінарыі кс. магістр ліцэнцыят Аляксей Раманчук прывітаў усіх прысутных,
а затым са справаздачаю за 2005/2006 навучальны год звярнуўся да прысутных віцэ-рэктар
кс. доктар Ян Крэміс, які храналагічна прадставіў асноўныя падзеі жыцця семінарыі
за мінулы год, а такасма нагадаў пра яе сённяшні стан: колькасць семінарыстаў, выкладчыкаў
і т.п. Кс. магістр ліцэнцыят Андрэй Зайчык, выкладчык Святога Пісання, прачытаў удзельнікам
інаўгурацыі рэферат на тэму «Біблейскія аспекты беларускай літаратуры Сярэднявечча».
Кардынал Казімір Свёнтэк у свёй прамове нагадаў пра новую гісторыю Касцёла на
Беларусі (г. зн. з 1989 г.), пачатак якой даў Слуга Божы Ян Павел ІІ, адраджаючы касцёльныя
структуры і мянуючы на нашых землях біскупаў. Кардынал Казімір Свёнтэк таксама ўручыў
дэкрэты новым выкладчыкам семінарыі, якія разам прачыталі прадпісанае кананічным правам
вызнанне веры і падпісалі яго. Рэктар семінарыі кс. доктар Ян Саламон урачыста
аб’вясціў 2006/2007 навучальны год адкрытым і заклікаў семінарыстаў не затрымлівацца
на шляху семінарскай фармацыі, а нястомна ісці да мэты. Ён таксама пажадаў семінарыстам,
выкладчыкам, адміністрацыі і супрацоўнікам семінарыі поспехаў у новым навучальным
годзе і ўручыў 8-мі семінарыстам-першакурснікам студэнцкія білеты. Кс. пралат
Эдмунд Даўгіловіч-Навіцкі, які нядаўна быў прызначаны адказным за фармацыю семінарыстаў
Мінска-Магілёўскай архідыяцэзіі, перадаў пажаданні ўсім прысутным ад Апостальскага
Адміністратара архідыяцэзіі біскупа Антонія Дзям’янкі, а таксама выказаў падзяку кіраўніцтву
семінарыі за сумленную працу, перададзеныя семінарыстам веды і веру. Звяртаючыся да
семінарыстаў, ён заахвоціў іх цаніць і развіваць у сабе ласку паклікання.