Imzot Miliore thekson në OKB nevojën e dialogut e të bisedimeve për çështjen bërthamore.
(6.10.2006 RV)Thirrja e fuqishme për dialog në temën e teknologjisë bërthamore
– në qendër të fjalimit të imzot Çelestino Miliores, vëzhgues i përhershëm i Selisë
së Shenjtë pranë OKB-së. Prelati foli për temën bërthamore në Komitetin e parë të
Sesionit të 61-të të Asamblesë së Përgjithshme të Kombeve të Bashkuara në Nju Jork,
duke theksuar me forcë se dialogu në këtë fushë kaq kritike, duhet të ecë përpara.
Vëzhguesi i Selisë së Shenjtë kujtoi se bota e sotme është në udhëkyq: mund të ndjekë
rrugën e kufizimit të përhapjes së energjisë bërthamore, dmth rrugën e dialogut e
të bisedimeve shumapalëshe, ose rrugën që çon në shumfishimin e numrit të shteteve
që pajisen me teknologji bërthamore, gjë që ndikon edhe në rritjen e kërcënimit të
terrorizmit bërthamor. Të krijohet përshtypja se bashkësia ndërkombëtare e ka ndër
mend të ecë në rrugën e dytë – vërejti imzot Miliore – jo sepse është e vetëdijshme
që duhet ndjekur kjo rrugë, por sepse nuk i ka bërë mirë llogaritë, për shkak të
diskutimit shterpë e të paralizimit të mekanizmave shumpalëshe që kanë të bëjnë me
rezolutat e konflikteve. E dialogu është fjala kyçe që i përshkon të gjitha temat
tjera, kur diskutohet për situata konfliktesh, shkatrrimesh, humbjesh të jetëve njerëzore.
Imzot Miliore foli me shifra tepër shqetësuese: kujtoi se sot në botë numrohen 27.
000 armë bërthamore dhe se shpenzimet ushtarake e kalojnë shifrën e një mijë miliard
dollarëve. E forcat ushtarake nuk ndikojnë aspak në përmirësimin e jetës së njeriut,
përkundrazi: e brejnë qytetërimin duke i shkaktuar njerëzimit vuajtje të mëdha, që
nuk mund të përligjen në një epokë së cilës nuk i mungojnë mekanizmat për të biseduar,
për të ndërmjetësuar, për ta siguruar e për ta mbrojtur paqen.