Nënshtetësi botërore, kapital shoqëror global, autoritet politik mbikombëtar: propozime
të kardinalit Martino në Institutin Katolik të Parisit.
(3.10.2006 RV)Nënshtetësi botërore, kapital shoqëror global, autoritet politik
mbikombëtar: këto janë tri pistat e reflektimit, parë në dritën e doktrinës shoqërore
të Kishës, që u propozuan sot nga Kardinali Martino, kryetar i Këshillit Papnor të
Drejtësisë e Paqes, në hapjen e Vitit Akademik të Institutit Katolik të Parisit. Duke
u mbështetur mbi Përmbledhjen e doktrinës shoqërore të Kishës, si kujtoi katër parimet
themelore: dinjitetin dhe lirinë e njeriut, të mirën e përbashkët, ndihmën dhe solidaritetin
– kardinali vuri theksin mbi tre koncepte të reja të kësaj doktrine, të cilat ua paraqiti
si pista reflektimi profesorëve dhe studentëve, duke pasur posaçërisht parasysh panoramën
e sotme ndërkombëtare. Duke folur për konceptin e nënshtetësisë botërore, kardinali
theksoi se kjo nënshtetësi vjen para çdo nënshtetësie ligjore kombëtare, sepse çdo
njeri i përket familjes së vetme njerëzore. Sipas Hirësisë së Tij, dënimi i racizmin,
mbrotja e të miturve, asistenca e emigrantëve dhe e refugjatëve, mobilizimi i solidaritetit
ndërkombëtar në ndihmë të të gjithë nevojtarëve, pavarësisht në se janë nënshtetas
të një shteti apo jo, s’janë tjetër veçse zbatime të parimit të nënshtetësisë botërore. Më
pas kardinali foli edhe për kapitalin shoqëror, i cili duhet shtrirë në nivel global,
si burim kryesor i bashkësisë botërore. Së fundi ripohoi nevojën për një autoritet
politik botëror, duke pasur parasysh se sot asnjë fuqi kombëtare, sado e fortë që
të jetë, nuk është në gjendje të vërë, e vetme, bazat e paqes botërore e të së mirës
së përbashkët universale. Sonte kardinali Martino theksoi në selinë e Parisit
se “Dashuria për të afërmin është në zemrën e doktrinës shoqërore të Kishës”.