Krahu i djathtë i R. Karaxhiqit, Momçilo Krajishnik dënohet më 27 vjet burgim nga
Haga
(28.9.06. RV) 27 vjet burgim për krime kundër njerëzimit. Ky është dënimi
që gjyqi ndërkombëtar i Hagës për krimet në ish-Jugosllavi, i dha Momçilo Krajishnikut,
krahut të djathtë të Radovan Karaxhiqit. Gjykata sidoqoftë njohu pafajsinë e të
pandehurit për akuzën e gjenocidit. Ish-kryetar i parlamentit të serbëve të Bosnjës
gjatë luftës civile në ish-Jugosllavi, Krajishniku u arrestua në vitin 2000 dhe fillimisht
u deklarua i pafajshëm.
Nuk ka të ndalur vala e dhunës në Irak. Në Bagdad
një varg atentatesh shkaktoi rreth dhjetë viktima, civilë dhe policë. Ndërkaq gjatë
24 orëve të fundit në lagje të ndryshme të kryeqytetit u gjetën 40 kufoma me shenja
të dukshme torturash.
Përfshirja më e gjerë e Pakistanit dhe Afganistanit
në luftën kundra terrorizmit si edhe paqëtimi ndërmjet presidentit pakistanas
Musharraf me atë afgan Karzai ishin synimi i takimit të djeshëm në Uashington organizuar
nga presidenti amerikan Xhorxh Bush. Kohët e fundit Afganistani akuzoi Pakistanin
se mbron dhe edukon terroristët islamikë dhe kërkoi mbylljen e shkollave kuranike.
Kryeministri
izraelit Ehud Olmert do të takohet me presidentin palestinez Abu Mazen. Lajmi
u dha nga vetë kryeministri Olmert gjatë një interviste për radion kombëtare. Kryeministri
përsëriti gjithashtu se Tel-Avivi nuk ka aspak ndërmend të lirojë të burgosurit palestinezë
nëse më parë nuk lirohet rreshteri izraelit, marrë peng nga Hamasi. Ndërsa duke folur
për Sirinë, Olmert mohoi çdo formë mundësi bisedimimesh me këtë vend, të cilin e cilësoi
si “mbështetjen kryesore të organizatave terroriste palestineze”.
“Janë
bërë përparime”. Kjo ishte deklarata e përfaqësuesit të lartë të BE-ian për politikën
e jashtme Javier Solana, pas takimit në Berlin me kryenogociatorin iranian Ali Larixhani
për pezullimin e pasurimit të uraniumit. Solana njoftoi gjithashtu se javëne ardhshme
do të ketë gjithashtu edhe një takim tjetër diplomatik me palën iraniane.
Vazhdojnë
përleshjet në provincat jugore të Tajlandës, me shumicë myslimane. Gjatë orëve
të fundit u vranë dy vetë. Përgjegjës për sulmet janë rebelët separatistë myslimanë,
të cilët prej më shumë se dhjetë vjetësh janë në ndeshje të përhershme me autoritetet
e Bangkokut. Vetëm dje u vranë katër budistë.
Të dielën e ardhshme në Brazil
do të zhvillohen zgjedhjet presidenciale. Kandidatët kryesorë janë Lula, presidenti
i tanishëm dhe rivali i tij më i mundshëm Gjeraldu Alkmin, i partisë socialdemokrate.
Sipas sondazheve ka gjasa që ky i fundit të jetë edhe fituesi.