Kisha është në anën e njeriut.” Këtë pohoi Benedikti XVI në fjalimin drejtuar ambasadorit
të ri gjerman pranë Selisë së Shenjtë, Hans Hening Horstman, me rastin e paraqitjes
së letrave kredenciale në Kastel Gandolfo.
(28.9.2006 RV) Fjalët e Benediktit XVI drejtuar ambasadorit gjerman: mbroni jetën,
aborti nuk mund të përligjet, jepni strehim të krishterëve të persekutuar.Kisha
nuk detyron askënd t’i besojë Ungjillit, por respekton me frymë tolerance çdo njeri,
kulturë e besojmë. Këtë pohoi sot Papa Benedikti XVI duke pritur në audiencë në Vatikan,
ambasadorin e ri gjerman pranë Selisë së Shenjtë, Hans Hening Horstman, për paraqitjen
e letrave kredenciale. “Atje ku ka bashkim e ku njerëzit përforcohen në mirësi
në saje mesazhit të fesë- tha Ati i Shenjtë- forcohet edhe bashkëjetesa njerëzore
në shoqëri, gjë që u jep zemër qytetarëve ta kuptojnë përgjegjësinë që ka secili për
të mirën e përbashkët. Kisha nuk imponohet – vijoi Papa – nuk detyron njeri ta pranojë
mesazhin e Ungjillit. Prandaj takimi me të tjerët duhet të karakterizohet nga toleranca
dhe mirëkuptimi kulturor. Por – vërejti Ati i Shenjtë – toleranca nuk duhet të ngatërrohet
me indiferencën, që është e kundërta e interesimit të thellë kristian për njeriun
dhe për të mirën e tij. Toleranca e vërtetë ka gjithnjë parasysh respektimin e njeriut,
krijuar nga Hyji, i cili e do jetën e çdo njeriu. E pikërisht lidhur me dinjitetin
e njeriut, Benedikti XVI rikujtoi disa nga shtyllat e moralit të krishterë, posaçërisht
mbrojtjen e martesës e të familjes, sot të kërcënuara nga ndryshimi i konceptimit
të bashkimit bashkëshortor dhe mbrojtjen e jetës në fazat e para, që rrezikohet nga
aborti e sidomos nga mbytja e embrioneve me handikap. Aborti – theksoi Ati i Shenjtë
– nuk mund të përligjet për asnjë arsye, duke pasur parasysh se Zoti e do çdo jetë.
Nga mbrojtja e jetës, Papa kaloi tek mbrojtja e refugjatëve, posaçërisht atyre
që kërkojnë strehim politik për arsye të persekutimeve politike ose fetare. Ati i
Shenjtë u bëri thirrje autoriteteve gjermane të mos i riatdhesojnë këta njerëz, por
ta lehtësojnë integrimin e tyre në Gjermani, vend që – nënvizoi Papa – i ka portat
e hapura për botën. Së fundi Benedikti XVI kujtoi traditën kulturore gjermane,
që për edukimin e të rinjve parashikon edhe mësimin e fesë përmes të cilit – theksoi
Benedikti XVI - duhet t’i jepen rinisë njohuri për traditat e mëdha që kanë formuar
historinë e kulturën evropiane e që vijonë ta frymëzojnë.