У Маскве прайшла супольная каталіцка-мусульманская прэс-канфярэнцыя.
Прамова Свяцейшага Айца Бенедыкта XVI°, якая выклікала незадаволенасць у шэрагу мусульманскіх
краінаў, не з’яўляецца перашкодай на шляху да іслама-каталіцкага дыялогу ў Расіі,
заявілі прадстаўнікі мусульманскай і каталіцкай грамадаў краіны. “У духоўнай сферы
вельмі цяжка прыйсці да кампрамісу. У прадстаўнікоў кожнай канфесыі ёсць уласная логіка,
якая заснаваная на рэлігійнай традыцыі, багаслоўскіх працах, якія былі напісаныя стагоддзі
таму. У той жа час, у эпоху глабалізацыі мы павінны разам будаваць культуру міжканфесыйнага
дыялога. Альтэрнатыва – зварот да часоў крыжовых паходаў, якія крывёй тапілі рэлігійныя
пачуцці апанентаў”, - заявіў прадстаўнік Рады муфтыяў Расіі Фарыд Асадуллін ў мінулы
чацвер на прэс-канфярэнцыі ў Маскве. Ён адзначыў, што выказванні Бенедыкта XVI°
у чымсці сталі “тыповымі для нашага часу”. “Iсламафобія зрабілася родавой рысай у
многіх еўрапейскіх соцыўмах. З недраў самаго хрысціянскага свету часта чуюцца галасы,
што агульнай сусветнай тэндэнцыяй з’яўляецца ўзрастаючы інтэрэс да ісламу. Разам з
ісламафобіяй цяпер відавочнай ёсць ісламафільская тэндэнцыя”, - лічыць Фарыд Асадуллін. Па
ягоных словах, іслам не толькі рэлігія “арабаў, туркаў, чачэнцаў, татараў, інгушаў,
іслам не абвяргае рэлігійны вопыт юдэяў і хрысціянаў”. “Межрэлігійны дыялог мусульманаў
і католікаў у Расіі – гэта гістарычная рэчаіснасць, гэта наша штодзённасць. Вопыт
супрацоўніцтва мусульманаў і католікаў у Расіі можа быць прыкладам для іншых краінаў”,
- дадаў прадстаўнік Рады муфтыяў. У сваю чаргу, Генеральны сакратар Біскупскай
канфярэнцыі Расіі а.Iгар Кавалеўскі адзначыў, што прамова Папы ў Германіі, а таксама
разыходжанні ў яе зразуменні паміж Радай муфтыяў і каталіцкай грамадой краіны не з’яўляюцца
перашкодай для іслама-каталіцкіх адносінаў. “Тым болей што ў нас дадзеная праблема
не выклікала такой рэзкай рэакцыі, як у некаторых краінах, дзе традыцыйна распаўсюджаны
іслам”, - дадаў а.Iгар. На ягоную думку, каталіцкая грамада Расіі “нешматлікая
і па сваёй натуры заклікана да актыўнага дыялога і супрацоўніцтва з прадстаўнікамі
і хрысціянскіх грамадаў, і іншых рэлігій, у прыватнасці, тых, якія для Расіі з’яўляюцца
традыцыйнымі”. Ён нагадаў, што ў лістападзе 2005 года ў Маскве адбылася супольная
канфярэнцыя мусульманаў і католікаў, прымеркаваная да 40-гадавіны прыняцця на II Ватыканскім
саборы дэкларацыі “Nostra Aetate”, якая акрэсліла адносіны стаўленне Каталіцкай Царквы
да нехрысціянскіх рэлігій і адкрыла новую старонку ва ўзаемаадносінах паміж рэлігіямі. Пры
гэтым, падкрэсліў а.Iгар, згаданая канфярэнцыя была склікана па ініцыятыве мусульманскага
боку. “Гэта самы іскравы знак таго, што адносіны паміж нашымі грамадамі ў Расіі добрыя”,
- зазначыў Генеральны сакратар Біскупскай канфярэнцыі Расіі.