Kryeipeshkëvija e Tiranë-Durrësit në festë. Nesër nëKatedralen e Shën Palit shugurohet
ipeshkvi i ri ndihmës i Tiranë-Durrësit, imzot Gjergj Frendo, misionar domenikan
(22.9.06. RV) Nesër në ora 11.00 në Kishën Katedrale të Shën Palit Apostull,
në Tiranë, shugurohet ipeshkvi i ri ndihmës i kryeidioqezës së Tiranë-Durrësit, imzot
Gjergj Frendo, misionar domenikan. Ati i Shenjtë Benedikti XVI duke u përkujdesur
për mbarëvajtjen e Kishës në Shqipëri, para disa muajsh ka emruar misionarin domenikan
nga Malta, Atë Gjergj Frendon, ipeshkëv ndihmës për kryeipeshkëvinë e kryeqyetit të
Shqipërisë. Ndërsa shugurimin ipeshkvnor të ipeshkvit të ri të Tiranës izmot Frendos
do ta bëjë kryeipeshkëvi metropolit i Tiranës dhe presidenti i Konferencës Ipeshkëvore
katolike të Shqipërisë, imzot Rrok Mirdita në bashkëkremtim me kryeipeshkëvijë tjerë
nga Malta, Italia, Mali i Zi dhe Shqipëria. Për këtë rast, për të marrë pjesë
në këtë ditë gëzimi për Kishën e Tiranës, kishin ardhur nga Malta një grup besimtarësh
e miqësh të ipeshkvit të ri bashkë me barinjët e tyre. Në Meshën solemne pritet të
marrin pjesë edhe shumë besimtarë nga e tërë kryeipeshkëvia por edhe nga mbarë Shqipëria. E
ne po ju propozojmë biografinë e ipeshkvit të ri: Atë Gjergj Frendo ka lindur në
Qormi të Maltës më 4 prill 1946, ku edhe është pagëzuar me emrin Anthony (Anton).
Më 1962 hyri në Urdhërin e Predikatarëve ( Domenikanëve). Nisi menjëherë studimet
filozofike e teologjike në Kolegjin Filozofiko-Teologjik Domenikan të Rabatit në Maltë,
ku edhe bëri kushtet e përjetshme rregulltare në vitin 1967 dhe u shugurua meshtar
më 7 prill 1969. Në vitin 1973 u diplomua në Romë në Drejtësinë Kanonike Kishtare
pranë Universitetit Papnor të Shën Tomës (Angelicum). U kthye në Maltë ku dha mësim
në Kolegjin Domenikan të Rabatit dhe në Fakultetin e Teologjisë në Maltë. Nga viti
1974 deri në vitin 1996 kreu disa detyra në urdhërin Domenikan: qe mësues i novicëve,
epror kuvendi, famullitar e provincial; ndërsa në Kryedioqezën e Maltës: avokat e
gjykatës i Gjykatës Ndërdioqezane të shkallës së dytë. Nga viti 1992 deri më 1996
ka qenë Kryetar i Konferencës së Eprorëve të Mëdhenj të Maltës. Nga viti 1997 ndodhet
në Shqipëri ku, duke nisur nga viti 1998, kryen detyrën e Vikarit të Përgjithshëm
të Kryedioqezës së Tiranë-Durrësit e, nga viti 2001, atë të zevendës-gjyqtarit të
Gjykatës Ndër-Dioqezave të shkallës së parë. Nga viti 1999 deri më 2003 ka qenë Kryetar
i Konferencës së Eprorëve të Mëdhenj në Shqipëri e, nga viti 2001 deri më 2005, anëtar
i Këshillit ekzekutiv të Bashkimit të Konferencave Evropiane të Eprorëve të Mëdhenj.
Imzot Gjergj Frendo flet mirë anglishten, italishten e shqipen, sikur dëshmon edhe
ky fragment që kemi shkëputur nga intervista që kemi bërë me të posa është emruar
nga Papa ipeshkëv i ri. Ta dëgjojmë