Është keqkuptuar fjalimi i Papës mbi Islamin. Sqarim i Atë Lombardit, pas protestave
të disa përfaqësuesve myslimanë.
(15.9.2006 RV)Papa nuk ka pasur kurrë asnjë qëllim për të fyer ndjenjat fetare
të myslimanëve; përkundrazi, ushqen ndaj fesë së tyre, ashtu si ndaj feve të tjera,
ndjenja respekti e dialogu. Këto janë, përmbledhtas, fjalët që tha dje Atë Lombardi,
drejtor i Sallës së Shtypit të Selisë së Shenjtë, lidhur me interpretimin që i kanë
bërë disa vende fjalimit të Benediktit XVI në Universitetin e Regensburgut, më 12
shtatorin e kaluar, gjatë shtegtimit të tij në Bavari, që përfundoi dje. Në botën
myslimane vijuan edhe sot protestat, lindur pas keqkuptimit të fjalimit të Papës.
Por, të dëgjojmë sqarimin e Atë Lombardit: “Lidhur me reagimet e përfaqësuesve
myslimanë rreth disa fragmenteve të fjalimit të Atit të Shenjtë në Universitetin e
Regensburgut, është e nevojshme të vëmë në dukje se – siç vërehet nga një lexim i
vëmendshëm i tekstit – ajo që Papa ka për zemër, është refuzimi i qartë e rrënjësor
i përligjjes fetare të dhunës. Sigurisht Ati i Shenjtë nuk e kishte ndër mend të bënte
një studim të thelluar mbi xhihadin e mbi mendimin mysliman që lidhet me të, e aq
më pak të fyente ndjenjat e besimtarëve myslimanë. Përkundrazi, në fjalimet e mbajtura
gjatë shtegtimit në Bavari, Ati i Shenjtë e qorton hapur kulturën perëndimore, duke
e ftuar të heqë dorë nga përbuzja e Zotit dhe nga cinizmi, që e konsideron talljen
me gjërat e shenjta si një të drejtë të lirisë (Fjalimi i 10 shtatorit), ndërsa thekson
se qëndrimi i drejtë ndaj përmasës fetare, është kusht themelor për një dialog të
frytshëm me kulturat e mëdha e me fetë e botës. Pikërisht në përfundimet e fjalimit
të mbajtur në Universitetin e Regensburgut, Benedikti XVI pohoi : ‘Kulturat thellësisht
fetare të botës, pikërisht në përjashtimin e hyjnores nga universaliteti i arsyes,
shohin një sulm që u bëhet bindjeve më intime. Arsyeja e shurdhër përballë hyjnores,
që e kufizon fenë në fushën e nënkulturave, është e paaftë të dialogojë me kulturat’.
Është e qartë, pra, se Ati i Shenjtë dëshiron të shprehë respektin dhe të nxisë dialogun
me fetë dhe kulturat e tjera, e natyrisht edhe me Islamin.
Për të na sqaruar
më tej për këtë atmosferë, intervistuam Atë Justo Lakuncën, ish-rektor i Institutit
Papnor të Studimeve Arabe dhe të Islamistikës: Përgjigje: - Papa ka nënvizuar
vetëm se dhuna ose lufta nuk mund të kenë themel fetar. E lidhur me këtë, Ati i Shenjtë
s’ka bërë tjetër, veçse ka përsëritur ndjenjat dhe dëshirat e miliona myslimanëve
të cilët, në një mënyrë a në një tjetër, thonë: nuk mund të lidhen dhuna me Islamin.
Ne jemi myslimanë dhe dëshirojmë të jemi besimtarë myslimanë në botën e sotme, por
duke iu kundërvënë atyre që e përdorin fenë për të sulmuar të tjerët me dhunë. Papa,
sipas meje, është bërë zëdhënës i miliona e miliona njerëzve në botë, edhe myslimanë,
që mendojnë se është plotësisht e papranueshme të lidhet dhuna me fenë. Feja nuk mund
të jetë baza e kurrnjë konfliktit, e kurrnjë lufte, e kurrnjë forme të dhunës, e
kurrnjë sulmi që synon t’i zhdukë të tjerët. Pyetje: - Atë Lakunca, pse
reaguan kështu disa përfaqësues të Islamit? Përgjigje: - Për dy arsye. Së
pari, sepse bota islamike dhe myslimanët janë tepër, tepër të ndjeshëm ndaj të gjithë
atyre që flasin për Islamin, posaçërisht kur nuk i përkasin fesë myslimane. Arsyeja
e dytë është se Papa preku një pikë tepër delikate, atë të dhunës e të luftës. Mund
të themi se këto janë dy arsyet për të cilat bota islamike - nga Egjipti në Turqi,
nga Evropa, në vendet tjera myslimane, reagoi në këtë mënyrë.