Mbrëmë ndërroi jetë dhe sot u varros Dom Jak Prenku, meshtar në Mitrovicë
(14.9.2006 RV) Mbrëmë më 13 shtator ndërroi jetë në moshën 62-vjeçare meshtari
katolik i Mitrovicës Dr. Dom Jak Prenku, ndërsa sot u bë edhe varrimi i tij. Dom Jaku
ishte doktoruar në teologji në Romë para gati dyzet viteve dhe ka shërbyer për mëse
20 vite në Kishën Katolike "Zonja e Fatimës" të Mitrovicës. Edhe pse kohëve të fundit
pati lënguar nga sëmundja e sheqerit, aktiviteti i tij kishtar dhe përgjithsisht shoqëror
ka qenë shembullor. Ndër personalitetet publike në Mitrovicë prifti Don Jak Prenku
ka qenë personi më shembullor për vizionin, guximin dhe intelektin e tij. Aktiviteti
i tij ka qenë i përqëndruar në krijimin e paqes e tolerancës në një ambient skajshmërisht
të polarizuar siç ishte Mitrovica e pasluftës. Edhe pse bashkësia katolike në Mitrovicë
është numerikisht e vogël Dom Jak Prenku ishte i pari në çdo aktivitet gjithëpopullor
në këtë qytet. Vdekja e Dom Jakut është një humbje e madhe për Kishën Katolike të
Kosovës dhe për Mitrovicën. Varrimi i Dom Jakut u bë sot në Ferizaj pranë prindërve
të të ndjerit, pas Meshës së Dritës të udhëhequr nga i gjithë kleri katolik i Kosovës.