(9.9.2006 RV)Pas ceremonisë së mirëseardhjes, Benedikti XVI u nis drejt Seminarit
Gregorianum e më pas drejt Marienplaz apo Sheshit të Marisë, që është zemra qytetit
të Munihut. Sheshi vigan zë deri në 10 mijë vetë. Në mes të tij lartohet shtylla e
Zojës së Bekuar, me shtatoren prej bronzi të praruar të Virgjërës, ngritur më 1638
nga Maksimiliani I, si shenjë falënderimi për përfundimin e pushtimit suedez në Luftën
Tridhjetëvjeçare. Këtu Papa shqiptoi lutjen drejtuar Zonjës së Bekuar, me të cilën
ia besoi përsëri Bavarinë Nënës së Zotit. Kujtojmë se më 28 shkurt 1982, pasi u emërua
Prefekt i Kongregatës për Doktrinën e Fesë, Kardinali Racinger qe përshëndetur me
dioqezën e Munih-Frizingës duke ia besuar Bavarinë Virgjërës Mari me një lutje të
shkruar me këtë rast. Sot, i gjunjëzuar përsëri tek këmbët e shtatores së Virgjës
Mari, Papa rikujtoi se po këtu është lutur shumë herë e posaçërisht në çastet vendimtare
të jetës së tij. Këtu, tridhjetë vjet më parë besimtarët e pritën plot përzemërsi
si Kryeipeshkvin e tyre të ri. Asokohe – kujtoi Ati i Shenjtë – e fillova shërbimin
tim me një lutje drejtuar Zojës së Bekuar. E po këtu – vijoi Papa Racinger– pesë vjet
më vonë, duke qenë i thirrur nga Papa në Romë, u përshëndeta me dioqezën time, duke
ia drejtuar rishtas një lutje Zojës, Pajtores së Bavarisë, për t’ia besuar mbrojtjes
së saj qytetin e Atdheun tim. Ati i Shenjtë vijoi të kthehej me kujtime në kohën
kur sapo ishte emëruar Kryeipeshkëv i Frizingës, si pasardhës i Shën Korbinianos.
Me Shenjtin lidhet legjenda që flet për shtegtimin e Tij në Romë, gjatë të cilit një
ari ia coptoi kafshën e barrës e shenjti e dënoi t’ia mbartëte plaçkat deri Romë.
Papa e vuri simbolin e ariut në qëndër të fjalimit të tij dhe, duke u nisur nga shpjegimi
i Shën Agostinit dhe i Psalmit 73, e krahasoi peshën e detyrës së tij me atë të kafshës
së barrës. Kafsha që tërheq parmenden – vijoi Ati i Shenjtë - është më pranë fshatarit,
i cili i prin; ashtu edhe ipeshkvi, në shërbimin e tij të përvujtë, është më pranë
Zotit, sepse kryen një shërbim tejet të rëndësishëm për Mbretërinë e Hyjit. Ariu
i Shën Korbinianos – tha Ati i Shenjtë - më jep gjithnjë zemër ta kryej shërbimin
tim me gëzim e shpresë. Ariu i Korbianos në Romë u la i lirë – shtoi Papa - ndërsa
për mua Zoti vendosi ndryshe. Pastaj, në përfundim, tek këmbët e Zojës, iu lut Nënës
së Zotit të ndërmjetësojë te Zoti e ta bekojë jo vetëm qytetin e Munihut e Bavarinë,
por mbarë Kishën universale dhe të gjithë njerëzit vullnetmirë.