У Тэзэ адзначылі першую гадавіну з моманту смерці брата Рожэ.
16 жніўня моладзь з 60 краінаў свету малілася ў Тэзэ ў першую гадавіну трагічнай
смерці заснавальніка экуменічнай суполкі брата Рожэ. Богаслужба адбылася ў 20.30 –
брат Рожэ быў забіты троху пазней, у тым самым храме Прымірэння, з яго характэрнымі
ўсходнімі купаламі. Згаданая суполка цяпер рыхтуецца да міжнароднага спаткання
ў Калькутте, якое пройдзе з 5 да 9 кастрычніка, і да штогадовай “Пілігрымкі даверу
на зямлі”, якая сёлета пройдзе з 28 снежня да 1 студзеня 2007 года ў Загребе (Харватыя),
дзе законнікі з Тэзэ арганізоўвывалі спатканні яшчэ ў 80-я гады мінулага стагоддзя. Iтальянская
каталіцкая газета “Аввенірэ” змесціла на сваіх старонках інтерв’ю з сучасным галавой
экуменічнай суполкі – братам Алаізам, які зазначыў, што члены суполкі глыбока перажылі
гадавіну смерці свайго заснавальніка. Але ў той жа час яны востра адчуваюць прысутнасць
Езуса сярод іх. Гаворачы аб падзеях мінулага года, брат Алаіз прыпомніў яго падарожжа
з двума іншымі братамі ў Маскву напярэдадні Пяцідзясятніцы, дзе яны былі сардэчна
прынятыя галавой РПЦ МП Алексіям II, які выказаў пажаданне працягваць плённае супрацоўніцтва
з суполкай, членамі якой з’яўляюцца многія маладыя праваслаўныя вернікі. Сучасны
кіраўнік суполкі Тэзэ падкрэсліў, што пошукі шляхоў да еднасці хрысціян працягваюць
быць адной з галоўных мэтаў членаў яго арганізацыі. Яны тры разы на дзень збіраюцца
на супольныя малітвы з чытаннем псалмоў і малітоўных разважанняў. Удзел у іх прыймаюць
вернікі самых розных хрысціянскіх канфесій. Спадчына брата Рожэ застаецца вялікай
і актуальнай і пасля яго смерці. Перад усім – гэта штодзённы зварот да поўні даверу
да Бога. “Зыходзячы ад гэтага, многае робіцца магчымым, і Езус пакажа нам наш шлях”,
- зазначыў брат Алаіз.