Mesazhi i Papës drejtuar takimit ndërkombëtar të Veprimit Katolik në Ugandë: lejoni
të pushtoheni nga dashuria e Zotit.
(7/8/2006 RV) Të besosh domethënë
t’i përkasësh Krishtit Zot, të pushtohesh nga dashuria e Tij, të impenjohesh të jesh,
me Të dhe për Të, dritë e kripë e tokës, tharm i shoqërisë”: Kështu shkruan mes tjerash
Papa Benedikti XVI në mesazhin e tij, nënshkruar nga Sekretari i Shtetit, kardinali
Angelo Sodano, drejtuar pjesëmarrësve të Takimit të III Kontinental Afrikan të Forumit
Ndërkombëtar të Veprimit Katolik, që po zhvillohet në Lugaci, në Ugandë deri më 9
gusht. Tema e këtij takimi është: “E ardhmja e Krishterimit në Afrikë e në botë” dhe
mbahet në kuadrin e përgatitjeve për Asamblenë e II Speciale për Afrikën e Sinodit
të Ipeshkvinjve. Në mesazhin e Tij, Benedikti XVI i fton pjesëmarrësit e këtij
takimi t’i kujtojnë figurat e Shenjtorëve, martirët ugandezë të Namugongos, për “të
ripohuar vendosmërinë për të ecur gjurmëve të atyre laikëve të krishterë – të rinj
e të bindur – që dëshmuan fenë e tyre me derdhjen e gjakut për Ungjillin”. Takimi
i III Kontinental Afrikan do të mbyllet me kremtimin e Meshës së Shenjtë pranë Shenjtërores
së Namugongos, ku gjeten vdekjen kah mbarimi i 1800 Karl Lwanga dhe shokët e tij.
“Për këta – shpjegon Papa – Jezu Krishti nuk qe simbol i një vlere dosido e abstrakte,
por simbol i një Personi të gjallë e konkret, një Personi absolutisht të jashtëzakonshëm,
për të cilin çdo i pagëzuar mund të thotë me fjalët e Shën Palit Apostull: ‘Më ka
dashur dhe ka flijuar vetveten për mua”. Në vijim të mesazhit, Ati i Shenjtë Racinger
ndalet tek “kontributi specifik që “laikët e krishterë mund të japin në ndërtimin
e qytetërimit të dashurisë” dhe përkujton programin e trefishtë që Papa Pali VI pati
propozuar gjatë vizitës së tij apostolike në Ugandë në vitin 1969. E pikërisht në
Shenjtëroren e Namugongos, Papa Montini i ftoi besimtarët ta duan Jezu Krishtin,
t’i jenë besnik Kishës e të jenë të fortë e guximtarë në kultivimin e vlerave shpirtërore
e njerëzore. Së fundi në mesazhin e tij, Papa Bendikti XVI fton të “dëshmohet bukuria
e fesë së flaktë, feja që shndërron jetën e përditshme dhe propozohet si mënyrë tërheqëse
për ata që pyesin e kërkojnë arsyet e shpresës që janë në ne, besimtarët”. Mesazhin
e tij, Papa e mbylli me bekimin e veçantë apostolik për të gjithë pjesëmarrësit e
këtij takimi. Po cilat janë sfidat për të ardhmen e Krishterimit në kontinentin
afrikan? Të dëgjojmë ipeshkvin imzot Francesco Lambiasin, asistent kishtar i Forumit
Ndërkombëtar të Veprimit Katolikë: “Më duket se sfida e parë është ajo e dialogut
ndërfetar, sepse Afrika konstaton rritjen e Krishtërimit dhe të Katolicizmit, në mënyrë
të posaçme, por konstaton edhe lulëzimin e sekteve të ndryshme fetare si dhe rritjen
e Islamit. Kështu mendoj se është i nevojshëm sqarimi i kushteve të dialogut, që janë
ato të cilat Papa Gjoni XXIII pati nënvizuar si: sinqeriteti, ndershmëria, qartësia,
respekti reciprok. Pastaj mendoj se të krishterëve e katolikëve u kërkohet besnikëria
ndaj Ungjillit e gatishmëria për dialogun mes veti për të shqyrtuar se cilat mund
të jenë pikat e kontaktit me islamin. Natyrisht Islamizmi nuk duhet përzierë me terrorizmin,
me palët ekstremiste e fondamentaliste, po duhet analizuar mirë nga afër”.