Impenjimi i Jezuitëve sot, 450 vjet pas vdekjes së Shën Injacit të Lojolës: intervistë
me atë Kolvenbah.
(3.8.2006 RV)Dy
ditë pas përkujtimit të Shën Injacit të Lojolës, jezuitët kujtuan të Lumin Pietro
Favre, një nga bashkëthemeluesit e Shoqërisë së Jezusit, meshtari i parë jezuit. Lindi
në Savojë në vitin 1506 e vdiq më 1547, vetëm 41 vjeç, i rraskapitur nga lodhja. Mbylli
sytë pasi pati përhapur në gjithë Evropën urdhërin e ri rregulltar me një zell apostolik,
që mund të krahasohet vetëm me atë të themeluesit, Shën Injacit të Lojolës, të cilin
e përkujtoi të hënën e kaluar eprori i përgjithshëm i Shoqërisë së Jezuitëve, Atë-
Peter Hans Kolvenbah gjatë homelisë në Kishën e Jezusit në Romë, 450 vjet pas vdekjes
së Shenjtit. Po cilat janë pikat kyçe të veprimtarisë të jezuitëve sot dhe objektivat
për të ardhmen? Përgjigjet vetë Atë Kolvenbah në mikrofonin e Radio Vatikanit:
Përgjigje:
- Dëshira e madhe për t’i ndihmuar njerëzit e nxiti Shën Injacin të themelonte
apostullimin e arsimit. Por edhe ndjeshmëria e Shenjtit ndaj problemeve shoqërore
përfaqëson sot një impenjim të rëndësishëm për Shoqërinë e Jezuitëve. Jemi përpjekur
gjithnjë të gjejmë çdo rrugë të mundshme për të dëshmuar dashurinë e Zotit. Sigurisht
që 450 vjet pas vdekjes së Injacit bota ka ndryshuar, por problemet e nevojat kryesore
të njeriut janë po ato. Ja pse nuk të çuditë fakti se Shoqëria e Jezusit vijon të
impenjohet edhe sot në të njëjtat fusha, në të cilat impenjohej në kohën e Shën Injacit.
Kështu apostullimi i shkollimit është ende sot një nga fushat më të rëndësishme të
impenjimit tonë. Ndërsa veprimtaria plot gjallëri në ndihmë të të varfërve e të braktisurve,
vijon të jetë detyrë e sfidë e vazhdueshme e Shoqërisë së Jezuitëve. Duhet të kërkojmë,
pa u lodhur kurrë, çdo rrugë që na ndihmon ta dëshmojmë në mënyrë të besueshme dashurinë
e Zotit permes impenjimit tonë në mbrojtje të drejtësisë. Veprimtaria misionare, për
të cilën Françesk Saveri u nis drejt Indisë, është ende një fushë e gjërë veprimi,
në të cilën Urdhëri dëshiron të realizojë karizmën e vet. E përsa i takon jezuitëve
aktivë në tokat e misionit, Shoqëria e Jezusit është urdhëri më i madh misionar.
Pyetje:
- Në cilat vende të botës, keni arritur më shumë rezultate, kryesisht përsa i
përket shtrirjes dhe rritjes shpirtërore? Përgjigje: - Sot në
Shoqërinë e Jezuitëve kemi akoma 897 rishtarë, e për këtë jemi thellësisht mirënjohës.
Por shifrat që kanë të bëjnë me rritjen në vende të ndryshme, varen nga shumë faktorë,
të cilët pjesërisht janë fetarë e pjesërisht shoqëror. Është e natyrshme që një shoqëri
e vjetër, me pak të rinj, të prodhojë, në kuptimin numerik, më pak thirrje për rrugën
tonë rregulltare, sesa një shoqëri në të cilën mosha mesatare e popullsisë është nën
30 vjeç. Duke e parë fenomenin në gjithë shtrirjen e e vet, mund të themi se provincat
jezuite indiane e afrikane kanë sigurisht një rritje më të madhe numerike. Për numër
të madh thirrjesh rregulltare shquhen sidomos Indonezia, Filipinet, Koreja e, vitet
e fundit, edhe Vietnami. Përsa i përket Evropës, vendi ku ka më shumë thirrje është
Portugalia, pasuar nga dy provincat jezuite polake. Pyetje: -
Cilat janë veprimtaritë më të rëndësishme që po organizoni gjatë këtij viti jubilar?
Përgjigje:
- Veprimtaritë ndryshojnë sipas natyrës së provincave. Po organizohen shtegtime
e veprimtari kulturore, takime shkencore mbi historinë dhe përshpirtërinë e Shoqërisë
së Jezuitëve, koncerte me muzikë realizuar nga jezuitët e Paraguajt, ekspozita e ushtrime
shpirtërore në gjurmët e Shën Injacit, botime e kremtime eukaristike, por edhe veprimtari
sportive për nxënësit tanë, si këtu, në Itali. Përkrah këtyre veprimtarive që kanë
të bëjnë me jetën e jashtme, në këtë vit jubilar po kujdesemi posaçërisht për risimin
shpirtëror të jezuitëve dhe të mbarë familjes injaciane. Për këtë qëllim janë organizuar
takime mbi ushtrimet shpirtërore e mbi rregullin, ushtrime shpirtërore të praktikuara
së bashku dhe veçime shpirtërore. Është për t’u kujtuar Mesha e 22 prillit në Bazilikën
e Shën Pjetrit, me të cilën kremtuam jubileun tonë së bashku me Atin e Shenjtë.