Në emër të Zotit, lëshoni armët: në lutjen e Engjëllit të Tënzot, në Kastel Gandolfo,
Benedikti XVI bëri thirrje për paqe në Lindjen e Mesme.
(31.7.06 RV)Në
emër të Zotit, ulni armët: në lutjen e djeshme të Engjëllit të Tënzot, kremtuar në
Kastel Gandolfo, Benedikti XVI bëri thirrje për paqe në Lindjen e Mesme, u kërkoi
besimtarëve të luten vazhdimisht për përfundimin e konfliktit dhe kërkoi ndërmejtësimin
e Marisë, Mbretëreshës së Paqes. Të ulen menjëherë armët e të fillojë me guxim
impenjimi për të siguruar paqen: në Lutjen e parë të Engjëllit të Tënzot në selinë
verore të Kastel Gandolfos, pas periudhës së pushimit në Vale D’Aosta, Benedikti XVI
bëri një thirrje të re të fuqishme për përfundimin e konfliktit në Lindjen e Mesme.
Ati i Shenjtë ripohoi se rruga e dialogut është e vetmja që mund e duhet ndjekur
për sigurimin e bashkëjetesës së qëndrueshme e afatgjatë ndërmjet popujve. Thirrja
e Papës u prit me entuziazëm nga besimtarët e mbledhur në oborrin e Kastel Gandolfos,
të cilët iu përgjigjen me britmën e njëzëshme: “Paqe! Paqe!”
“Në emër të
Zotit, ulni armët!”: është britmë e ngarkuar me dhimbje, thirrja e Benediktit
XVI për paqen në Lindjen e Mesme. Papa vuan bashkë me popujt e tronditur thellë nga
konflikti. E nuk është vetëm vdekja e shkatërrimi që e shqetësojnë Atin e Shenjtë:
“Në zemrat e shumë njerëzve – vëren me hidhërim Papa – po shtohet urrejtja e dëshira
për hakmarrje”. Këto fakte – vijon Ati i Shenjtë – tregojnë qartë se me dhunë nuk
mund të zbatohet drejtësia, të krijohet një rend i ri e të ndërtohet paqja e vërtetë.
E, prej këndej buron edhe britma për paqen: “Në emër të Zotit u drejtohem të
gjithë atyre, të cilët përgjigjen për këtë spirale dhune: të gjitha palët t’i ulin
armët! Qeveritarëve dhe Institucioneve ndërkombëtare u kërkoj të mos kursejnë asnjë
përpjekje për të arritur përfundimin e konfliktit e për t’i hapur kështu rrugën, përmes
dialogut, ndërtimit të bashkëjetesës afatgjatë e të qëndrueshme ndërmjet të gjithë
popujve të Lindjes së Mesme”. Papa, pra, inkurajon të gjithë njerëzit vullnetmirë
t’i dërgojnë sa më shumë ndihma humanitare popullsive të vëna në këtë provë të rëndë.
E, edhe një herë, kërkon nga besimtarët të bashkohen në lutjen për paqe: “Sidomos
të vijojë t’i lartohet nga çdo zemër Zotit të mirë e të mëshirshëm, lutja plot besim
që t’i japë hirin e paqes së Tij kësaj zone e mbarë botës”. E këtë thirrje
Papa ia besoi ndërmjetësimit të Marisë, Nënë e Princit të Paqes e Mbretëreshë e Paqes,
që nderohet aq shumë në një pjesë të mirë të vendeve të Lindjes së Mesme ku – ripohoi
Shenjtëria e Tij – shpresojmë të mbretërojë së shpejti ai pajtim, për të cilin Zoti
Jezus flijoi Gjakun e tij të çmuar. Benedikti XVI e kujtoi kështu rrugën që tregon
Kisha për sigurimin e paqes ndërmjet popujve: “Më shumë se kurrë shikojmë sa
profetik e njëkohësisht edhe sa realist është zëri i Kishës kur, përballë luftërave
e konflikteve të të gjitha llojeve, tregon rrugën e së vërtetës, të drejtësisë, të
dashurisë e të lirisë, siç na e dëshmon edhe Enciklika e pavdekshme “Pacem in terris”
e të Lumit Gjoni XXIII. Në këtë rrugë duhet të ecë edhe sot njerëzimi për të siguruar
paqen aq të dëshiruar”. Para thirrjes për paqe në Lindjen e Mesme, Papa përshëndeti
përzemërsisht besimtarët e mbledhur në Kastel Gandolfo ku, siç u tha vetë Ati i Shenjtë
– do të qëndrojë deri në fund të verës, me një ndërprerje të shkurtër për shtegtimin
apostolik në Bavari. Shenjtëria e Tij përshëndeti ipeshkvin e Albanos dhe autoritetet
civile, duke i falënderuar për mikpritjen. Më pas, gjithnjë duke iu drejtuar shtegtarëve,
u tha se ata kontrbuojnë për të vënë në dukje horizontin kishtar universal të takimit
për lutjen mariane, edhe në atmosferën e mjedisit familjar të selisë verore papnore
. Në çastin e përshëndetjeve, Papa kujtoi se këtë javë Kisha do të kremtojë disa shenjtorë
të mëdhenj, duke nisur nga dita e sotme, kur filluan kremtimet për festën e Shën Injacit
të Lojolës, themelues i Jezuitëve, e duke vijuar me Shën Alfons Maria de’Liguorin,
themelues i Redentoristëve, që do të kremtohet nesër, më 1 gusht. Pastaj më 4 gusht
do të përkujtohet Shën Gjon Maria Vianej, famullitari i Arsit, pajtori i famullitarëve.
“Shembulli dhe ndërmjetësimi i këtyre dëshmitarëve të ndritshëm – uroi Papa - na ndihmoftë
për të ecur përpara në rrugën e shenjtërisë”.