Një autobombë në xhami të Xhillalabadit, në Afganistan, 6 të vdekur.
(31.7.06 RV)Nisi sot në Afganistan mision i ri i trupave të NATO-s. Jugu i
vendit do të kontrollohet nga 18 mijë efektiva të Forcës Ndërkombëtare të ndihmës
për sigurinë i mbiquajtur ISAF. Këto do të zëvendësojnë trupat e koalicionit amerikan
Enduring Freedom. E menjëhershme përgjigja e talebanëve, të cilët premtuan se do t’i
presin ushtarët e rinj me atentate kamikazesh. Ndërkaq gjendja vijon të jetë e vështirë.
Së paku 8 persona u vranë dhe 16 të tjerë u plagosën sot paradite nga shpërthimi i
një autobombe para një xhamie në Xhalalabad, në provincën lindore të Ningarharit.
Kurse dje, 30 luftëtarë talebanë mbetën të vrarë në përpjekje me trupat amerikane.
Edhe
në Irak atentatet nuk kanë të sosur. Sot në mëngjes terroristët vranë me atentat një
funksionar të shërbimeve sekrete qeveritare dhe përgjegjësin e xhamisë sunite të kryeqytetit.
Po në Bagdad, 12 nëpunës të Dhomës së Tregtisë irakiano-amerikane u morën peng nga
persona që mbanin uniformat e ushtrisë irakiane.
Këshilli i Sigurisë,
i cili u mor sot me shqyrtimin e dosjes bërthamore iraniane, i dha afat Teheranit
të heqë dorë nga pasurimi i uraniumit brenda 31 gushtit. Në rast të kundërt OKB-ja
do ta ndëshkojë këtë vend me sanksione ekonomike.