450 vjet pas vdekjes së Shën Injac Lojolës, shpirti i tij i ri, vijon t’i tërheqë
njerëzit tek Zoti.
(31.7.06 RV)Sot
Kisha katolike përkujtoi Shën Injac Lojolën..Festa kremtohet sidomos në Spanjë,
vendlindje e Shenjtit. Ishte mëngjesi i 31 korrikut të vitit 1556 kur,
pas një nate plot vuajtje, Injaci i Lojolës vdiste në Romë në moshën 65 vjeçare, i
shoqëruar nga bekimi i Papës Pali IV. E pikërisht për të përkujtuar këtë ngjarje,
që ka ndodhur 450 vjet më parë, në Kishën e Jezusit në Romë sot u kremtua një Meshë
solemne, e kryesuar nga Eprori i përgjithshëm i Etërve Jezuitë, Atë Peter-Hans-Kolvenbah.
Me këtë rast u ekspozua edhe relikja me disa nga eshtrat e kafkës së Shën Injacit.
Por, si u kremtua Shenjti, posaçërisht në Lojolë? Përgjigjet, në mikrofonin e Radios
sonë, jezuiti Atë Huan Miguel Arregui, epror i provinçës së Lojolës: Përgjigje:
- Festa e Shën Injacit kremtohet dy ditë me radhë. Më 31 korrik, dita kryesore
e kremtimit, festohet në Azpeita, vend të cilit i përket Shenjti. Ndërsa më 1 gusht,
kremtohet në Lojolë me të gjitha autoritetet. Sot besimtarët e Azpeitës morën pjesë
edhe në procesionin tradicional. Ndërsa nesër, po këta besimtarë, të kryesuar nga
autoritetet e vendit, do të shkojnë, gjithnjë me procesion, deri në Lojolë. Këto festime
zgjasin 5 ditë. Pyetje: - Ç’përfaqëson figura e Shën Injacit për popullin
bask?Përgjigje: - Shenjti shikohet në dy mënyra. Në këndvështrimin e përshpirtërisë
së Tij – e kujtojmë se në Lojolë ka një qendër shumë të rëndësishme të kësaj përshpirtërie,
që vizitohet nga një shumicë njerëzish - e pastaj, në këndvështrimin e Shoqërisë së
Jezuitëve. Kjo Shoqëri është shumë universale përsa i përket punës që bën, misionit
edukativ dhe atij shoqëror në ndihmë të njerëzve më të varfër. Këtu Shën Injaci e
Shën Françesk Saveri janë shumë pranë nesh. Përsa i përket Shën Injacit, për ne ka
rëndësi të dorës së parë posaçërisht ruajtja e ushtrimeve shpirtërore në formën e
tyre të zanafillës. E kur kujtojmë Shën Injacin, nuk mund të mos na vijë menjëherë
ndër mend edhe Shën Françesk Saveri, i cili shquhet më shumë për impenjimin e tij
misionar. Por duhet theksuar se ky impenjim misionar është i rëndësishëm sepse në
bazë të tij është pikërisht përshpirtëria e Shën Injacit, e cila i jep këtij misioni
një këndvështrim shumë të veçantë. “Të duam e të shërbejmë në gjithçka”- kjo është
fraza më karakteristike e Shën Injacit, në të cilën ndjehet fuqimisht përshpirtëria
e Tij.