“Të ndalet zjarri menjëherë.” Kjo është thirrja që Papa i drejtoi palëve në konfliktin
e Lindjes së Mesme, dje gjatë ditës së veçantë të lutjes për paqe.
(24.7.06.RV)Zoti
fitoi mbi dhunën me Kryqin, me një dashuri të pa fund: janë fjalët e Benediktit XVI
shqiptuar në famullinë valdostane të Remè, ku dje u gjunjëzua në lutje për paqe në
Lindjen e Mesme. Dhuna e njeriut ka një kufi: dashurinë e Krishtit. Ky është mesazhi
që Benedikti XVI i drejtoi mbarë njerëzimit dje, në ditën e lutjes e të pendesës
për paqen në Lindjen e Mesme. Kjo nismë, shumë e dëshiruar nga Papa, bashkoi në një
përqafim vigan besimtarët e mbarë botës me popujt që vuajnë për shkak të luftës. Pas
lutjes së Engjëllit të Tënzot, kremtuar në Lë Kombë, pasdite Papa shkoi në famullinë
valdostane të Remes Sën Zhorzh, ku u gjunjëzua në lutje. “Krishti është paqja
jonë “ sepse duke vdekur në kryq, e mposhti armiqësinë e na bashkoi të gjithëve në
paqen e tij”. Papa e ripohoi këtë me forcë në çastin e kësaj prove të rëndë për popujt
e pafajshëm, të shtypur nën peshën e një konflikti të pamëshirë. Duke komentuar letrën
e Shën Palit drejtuar Efesianëve, Ati i Shenjtë shprehu shqetësimin që provohet përballë
dhunës, të cilën njerëzit e përdorin kundër vëllezërve të tyre: “Ka akoma luftë
ndërmjet të krishterëve, myslimanëve, hebrenjve; e janë të tjerë ata që i nxisin njerëzit
të luftojnë e gjithçka është ende plot me armiqësi, me dhunë. Ku është fryti i flijimit
Tënd? Ku është, në histori, kjo paqe, për të cilën flet Apostulli Yt?”. Përgjigja
është: pikërisht Pajtimi i Zotit. Flijimi i tij nuk mbeti pa fryt. E këtu Papa nënvizoi
realitetin e madh të bashkimit të Kishës universale. Ndërsa më pas foli për ishujt
e paqes në Korpin e Krishtit. Kujtoi shenjtorët e dashurisë, që krijuan oazet e paqes
së Zotit në botë. E pastaj martirët, që dhanë dëshminë e paqes e të dashurisë, e cila
i vë kufi dhunës. Pikërisht kjo dashuri e pakufishme është mënyra e re që përdor Zoti
për të fituar mbi dhunën e mbi të keqen: “ Zoti fitoi mbi Kryq. Nuk fitoi me
një perandori të re, nuk përdori një forcë më të madhe se të kundërshtarit, për të
ngadhënjyer mbi të; fitoi në një mënyrë që nuk është njerëzore, si e përfytyrojnë
ne, me një perandori më të fortë se të gjitha të tjerat. Fitoi me dashurinë deri në
vdekje. Kjo është mënyra e re e fitores së Zotit: dhunës nuk i kundërvë një dhunë
më të fortë. Dhunës i vë përballë të kundërtën: dashurinë deri në fund të fundit,
Kryqin e Tij”. Duhe t’ia besojmë vetveten kësaj dashurie hyjnore – u tha Papa
besimtarëve të gjunjëzuar në lutje bashkë me të në famullinë e vogël mes malesh e
në mbarë botën – e të bëhemi ndërtimtarë të paqes. E më pas shtoi: “Duhet ‘t’ia çojmë
dashurinë tonë të gjithë njerëzve që vuajnë, duke e ditur mirë se Gjykatësi i Gjyqit
të fundit bëhet një me të vuajturit”. Më pas Ati i Shenjtë vuri theksin mbi
rëndësisnë e zemrës së mesazhit të krishterë. Ritheksoi se Zoti është dashuri. E kjo
është një e vërtetë që nuk zbehet, por vlerësohet edhe më shumë në dialog me fetë
tjera: “Sot në një botë shumkulturash e shumfesh, ka njerëz që tundohen të thonë:
“Për të siguruar paqen ndërmjet feve, kulturave, është më mirë të mos flitet tepër
për specifikën e Krishtërimit, dmth për Jezusin, për Kishën, për Sakramentet. Të merremi
me gjërat që janë pak a shumë të përbashkëta… Por kjo nuk është e vërtetë. Pikërisht
në këtë çast kemi nevojë për Fytyrën e Krishtit, për ta njohur më mirë Fytyrën e vërtetë
të Zotit e për të sjellë kështu pajtim e dritë në këtë botë”. Njëkohësisht me
dashurinë, me mesazhin e dashurisë përmes gjithçka mund të bëjmë për njerëzit që
vuajnë në këtë botë – përfundoi Benedikti XVI – duhet të japim edhe dëshmi për këtë
Zot, për fitoren e Zotit pikërisht në mospërdorimin e dhunës në Kryqin e Tij.