(21.7.06 R.V.)
Në Irak gjendja vazhdon të jetë e paqëndrueshme. Sot paradite 8 irakianë, gjashtë
prej të cilëve policë, humbën jetën në përpjekje me rebelët në jug të Bagdadit. Po
sot një person u vra nga një bombë që shpërtheu në afërsi të një xhamie sunite në
Kalis, kurse ushtria njoftoi se gjeti tre trupa të pajetë në periferi të Faluzhës
dhe Kirkukut. Në Somali situata mbetet e nderë. Oborret islamike kërcënuan se
do të nisin “një luftë të shenjtë” kundër trupave etiopike që, sipas dëshmitarëve
janë rreshtuar në Baidoa, seli e qeverisë së përkohëshme dhe e parlamentit të Somalisë.
Ajo çka e vështirëson edhe më tepër situatën e popullsive vendase është thatësira
që zgjat prej një viti.
Franca, Gjermania dhe Britania e Madhe i paraqitën
dje Këshillit të Sigurimit një rezolutë të re përmbi çështjen bërthamore iraniane.
Dokumenti flet për “masa të përkohshme” që i paraprijnë sanksioneve të mundëshme ndërkombëtare,
në rast se republika islamike nuk do t’i pezullojë programet e pasurimit të uraniumit.
Nga ana tjetër Teherani përsëriti se është i hapur për bisedime.
SHBA-ës
janë të gatshme të marrin pjesë në diskutime së bashkë me Korenë e Jugut, Kinën, Japoninë
dhe Rusinë me qëllim që të sjellin në tavolinë të bisedimeve edhe Korenë e Veriut
për negociata mbi çështjen bërthamore. Ka kohë që Korea e Veriut po i bojkoton këto
negociata dhe vetëm para dy javësh hodhi disa raketa me rreze të gjatë e të mesme
veprimi.
Vdiq sot në moshën 82-vjeçare Ta Mok, ish- komandant i Kmerëve
të Kuq kamboxhianë. I akuzuar për genocid ndaj popullit të vet të kryer gjatë regjimit
të Pol Potit, Ta Mok, i mbiquajtur “kasapi” ndërroi jetë për shkaqe natyrore në një
spital të Phom Phenit.