Святой памяці брат Бэрнард Беленік 16 ліпеня 2006 г. на 73 годзе
жыцця адышоў да Пана святой памяці брат законны з супольнасці канвентуальных францішканаў
Бэрнард Беленік. Жалобную св. Імшу за супакой душы брата Бэрнарда цэлебраваў Апостальскі
Адміністратар Мінска-Магілёўскай архідыяцэзіі біскуп Антоній Дзям’янка. У цэлебрацыі
браў удзел а. Юзаф Макорчык, дэлегат Правінцыяла канвентуальных францішканаў і пробашч
парафіі Маці Божай Анёльскай у Гродне, які прамовіў гамілію. Брат Бэрнард Беленік
нарадзіўся ў Пагаранах каля Гродна. Ён быў першым францішканінам у нашай краіне ў
пасляваенныя гады. Патаемна ён уступіў у манаскі ордэн, склаўшы вечныя законныя шлюбы
13 жніўня 1981 г. Калісьці гэты законнік нёс служэнне ў пабернардынскім касцёле ў
Гродне і шмат дапамагаў кс. Міхалу Арановічу. Апошнія гады жыцця ён служыў Богу і
людзям пры францішканскім кляштары ў Гальшанах. Брат Бэрнард памёр нечакана па дарозе
з Гальшан у Іўе, у Трабах. Брата Бэрнарда ўсе ведалі як вялікага аптыміста. Шмат
разоў ён быў пілігрымам ў дыяцэзіяльны Марыйны санктуарый ў Тракелях, пілігрымаваў
да цудатворнага абраза Маці Божай Вастрабрамскай у Вільні, а таксама да Маці Божай
Чэнстахоўскай. З усмешкай на твары і дабрынёй у сэрцы гэты францішканін умеў знайсці
падыход да кожнага чалавека, таму што ішоў па жыцці, з надзеяй гледзячы ў будучыню.
Два яго пляменнікі па прыкладзе дзядзкі прысвяцілі сваё жыццё Богу ў святарстве —
а. Станіслаў Садоўскі і кс. Ян Гавецкі. Айцец Станіслаў, таксама як і святой памяці
брат Бэрнард, стаў францішканінам. На жалобнае набажэнства ў Гальшанскім касцёле,
дзе апошнія гады нёс сваё служэнне брат Бэрнард, сабраліся шматлікія айцы і браты
францішканскага ордэна, святары з Ашмянскага дэканату і шмат вернікаў, якім служыў
і за якіх маліўся, а таксама падаваў прыклад прысвячэння сябе Богу паводле евангельскіх
парадаў святой памяці брат Бэрнард. Брат Бэрнард быў пахаваны 18 ліпеня на гродзенскіх
могілках. Па дарозе труну з яго целам для развітання з нябожчыкам і малітвы за супакой
яго душы ўносілі ў касцёл у Іўі, а таксама ў францішканскі касцёл у Гродне. Развітацца
з ім прыйшлі тыя, хто добра ведаў брата Бэрнарда ў жыцці. Молячыся за супакой яго
душы, вернікі таксама ўзносілі свае малітвы з просьбамі аб ласцы новых пакліканняў
да святарства і законнага жыця, якія так патрэбныя нашай зямлі.