Të sigurohet punë dinjitoze për të gjithë: është kërkesa e kryeipeshkvit Tomazi në
Këshillin Ekonomik të OKB-së.
(7.6.2006 RV)Bashkësia ndërkombëtare të fuqizojë impenjimin për t’u siguruar
punë dinjitoze të gjithëve. Kështu u shpreh kryeipeshkvi Silvano Maria Tomazi në Këshillin
Ekonomik e Shoqëror të Kombeve të Bashkuara në Gjenevë. Vëzhguesi i përhershëm i Selisë
së Shenjtë pranë Zyrës së OKB-së në Gjenevë, uroi gjithashtu që të përfundojnë me
sukses bisedimet e Dohës mbi tregtinë botërore Bashkësia ndërkombëtare – theksoi
prelati – duhet ta riorganizojë impenjimin e saj për zhdukjen e varfërisë globale,
e cila përfaqëson ende sot një shkandull e njëkohësiht edhe një kërcënim serioz për
paqen e sigurinë në botë. Në vijim imzot Tomazi vërejti se njëkohësisht me shtimin
e pasurive në nivel botëror, thellohet edhe hendeku ndërmjet të pasurve e të varfërve.
E për të vlerësuar efektet e globalizimit - pohoi vëzhguesi i Vatikanit - është tepër
i nevojshëm bashkëpunimi ndërmjet aktorëve ndërkombëtarë në favor të zhvillimit. Posaçërisht
ndjehet nevoja për një koordinim më të mirë të politikave të investimit financiar,
të reformave agrare e të hyrjes ndër tregje. Pasojë e kësaj startegjie – theksoi prelati
- do të ishte zhdukja progresive e borxhit të jashtëm.