(6.7.2006 R.V.) Mbetet
e rëndë situata e krijuar pas hedhjes së raketave nga ana e Koresë së Veriut. Vetëm
sot zyrtarët koreanoveriorë me anë të një deklarate për shtyp pranuan se kanë kryer
manovra ushtarake me 7 raketa, një prej të cilave ndërkontinentale dhe se do të vazhdojnë
edhe në të ardhmen. Në komunikatë thuhet se hedhjet e raketave patën thjeshtë si qëllim
“rritjen e fuqisë mbrojtëse të ushtrisë koreanoveriore”. Ndërkaq Këshilli i Sigurisë
i OKB-së po shqyrton mundësinë e vendosjes së sanksioneve.
Këshilli i OKB-së
për të drejtat e njeriut vendosi sot dërgimin e një grupi ekspertësh në territoret
palestineze për të vëzhguar nga afër shkeljet e të drejtave njerëzore nga ana e ushtrisë
izraelite. Po ky këshill i kërkoi Tel-Avivit të ndërpresë operacionet ushtarake kundër
Hamasit dhe të lirojë politikanët dhe deputetët palestinezë të zënë rob.
*
* * Përsëri dhunë në Afganistan ku çdo ditë ka viktima të reja. Një ushtar i forcave
aleate dhe 35 rebelë u vranë në luftimet e djeshme gjatë një sulmi në provincën e
Helmandit. Gjendja është e nderë edhe në Kabul prej nga, për Radio Vatikanin, flet
themeluesi i organizatës “Emergency”, Gino Strada: Amedeo Lomonaco
Përgjigje:
Qyteti në këto çaste është i militarizuar. Ka shumë pak lëvizje dhe gjendja është
e nderë. Është një luftë në fazë të rindezjes.
Pyetje: Cilat janë sipas
teje shkaqet e kësaj dhune?
Përgjigje: Përshtypja ime është se nuk kemi
të bëjmë vetëm me një problem fraksionesh apo personash të armatosur. Mendoj se po
rritet padurimi i popullit ndaj këtij pushtimi ushtarak që tashmë vijon prej 5 vjetësh
dhe nuk po ndryshon kushtet e jetesës të vetë banorëve.
* * * Në Irak
një bombë shpërtheu sot në afërsi të një xhamie shiite në qytetin Nazhaf. Pati 13
të vrarë. Ndërsa të plagosurit e një shpërthimi në Kufa, gjithnjë në Nazhaf janë 37.
Për të parandalur atentatet kryeministri Al Maliki ndaloi rreptësisht të gjitha konferencat
me karakter politik nëpër universitetet e Irakut.
Përgjigja e Iranit për
paketën e ndihmave të ofruara nga grupi i të pestëve dhe Gjermania për çështjen bërthamore,
nuk do të jepet para fillimit të gushtit. Lajmi u bë i ditur nga burimet zyrtare iraniane
në Bruksel.
* * * Në Maqedoni partia socialdemokrate e Vllado Buçkovskit
humbi në zgjedhjet e djeshme. Pavarësisht nga trazirat e javëve të kaluara procesi
i votimeve u zhvillua në qetësi. Sipas disa rezultateve të pjesshme, partia e qendrës
VMRO-DPMNE e Nikola Gruevskit ka fituar shumicën e vendeve në parlament, arsye për
të cilën Buçkovski pranoi humbjen. Por, a shkaktoi habi në vend ky rezultat? Këtë
pyetje ia drejtuam Risto Carajkovit, korrespondent në Sofje i “Osservatore sui Balcani”: Eugenio
Bonanata
Përgjigje: Unë them se jo. Ishte e parashikueshme që opozita do
të ishte në avantazh. Mendoj se kjo fitore e opozitës po ndjek një prirje shumë të
qartë në të gjitha vendet në tranzicion: asnjë qeveri nuk rri në pushtet për më tepër
se 4 vjet. Kjo do të thotë se kur votohet votohet kundra atyre që qeverisin.
Pyetje:
Opozita do të kërkojë aleatë. A mund të bëhen parashikime?
Përgjigje: Nga
sa u deklarua dje, mazhoranca ka fituar një përqindje të madhe, është afër shumicës
absolute: shumica parlamentare do të ishte 61 vende, 61 mandate prej të cilave ata
thonë se kanë 55. Mendoj se partia e Arbër Xhaferit do të jetë aleatja shqiptare në
qeverisje. Kjo parti do të jetë e mjaftueshme për të formuar një qeveri.