(5.7.2006 RV) Gjendja në Lindjen e Mesme vijon të jetë e nderë. Disa helikopterë
izraelitë goditën zyrën e ministrit të brendshëm palestinez me qëllim që t’i bëjnë
presion qeverisë së Hamasit të lirojë ushtarin e rrëmbyer Xhilad Shalit. Ndërkaq militantët
e Hamasit u kundërpërgjigjën duke hedhur raketa Kasam kundra një shkolle në territorin
izraelit.
Provat e raketave me rreze të gjatë veprimi që u zhvilluan dje
në Korenë e Veriut po shkaktojnë pakënaqësi në qarqet diplomatike botërore. Japonia
vendosi rritjen e nivelit të alarmit ndërsa mbrojtja ajrore amerikane po mbikqyr situatën
e krijuar. Regjimi i Kim Jongut vazhdon të shpenzojë shuma të mëdha për ushtrinë ndërkohë
që rreth 20 milionë koreanoveriorë jetojnë në varfëri të plotë.
Qeveria
irakiane njoftoi se ka nisur bisedime me afro 20 grupe rebelësh pas paraqitjes së
planit të kryeministrit Al Maliki për pajtimin kombëtar. Megjithatë dhuna në vend
nuk ndalet. Shpërthimi i një autobombe pranë spitalit të Kirkukut shkaktoi një të
vdekur dhe dy të plagosur. Gjithashtu qeveria irakiane kërkoi hapjen e hetimeve mbi
vrasjen e një familjeje nga ana e ushtarëve amerikanë.
Edhe në Kabul sot
paradite pati atentate. Një autobus i ushtrisë u godit nga një bombë. Si pasojë një
kalimtar u vra dhe tre nëpunës të ministrisë së mbrojtjes u plagosën. Një shpërthim
tjetër ndodhi në veri të kryeqytetit por nuk dihet ende nëse ka viktima.
Ekstremistët
islamikë të Somalisë ekzekutuan dje dy tifozë në Mogadishu sepse po shihnin një ndeshje
futbolli të Kampionatit Botëror dhe shpërndanë turmën e të rinjëve që ishte mbledhur
para ekranit. Ekstremistët menjëherë pas marrjes së pushtetit kanë nxjerrë ligje për
ndalimin e shfaqjes së filmave dhe të programeve zbavitëse televizive.
*
* * Në Maqedoni u zhvilluan sot zgjedhjet parlamentare. Gjatë 20 ditëve të fushatës
elektorale pati incidente të rënda, madje edhe me armë, por kësaj here jo ndërmjet
shqiptarëve dhe maqedonasve si në 2001, por ndërmjet dy partive më të mëdha shqiptare:
Bashkimit Demokratik për Integrim të Ali Ahmetit, një nga ish-udhëheqësit e UÇK, dhe
Partisë Demokratike të Arbër Xhaferrit. Për mbarëvajten e votimeve votat e shqiptarëve
do të jenë vendimtare. Të dyja partitë shqiptare janë rreshtuar respektivisht përkrah
partisë së Vllado Buçkovskit i njohur për afrimin e Maqedonisë me BE-ian dhe partisë
së Nikola Gruevskit, udhëheqës i VMRO-DPMNE, partisë nacionaliste maqedonase. Sidoqë
të jetë rezultati i votimeve, bashkësia ndërkombëtare u ka bërë thirrje shqiptarëve
që të marrin pjesë në qeverisje sepse nga ta varet edhe integrimi i Maqedonisë në
Evropën e Bashkuar. Deri tani Maqedonia është i vetmi shtet i Ballkanit perëndimor
që ka fituar statusin e kandidatit për në BE-ian.
* * * Marrëdhëniet
e Serbisë me Bashkimin Evropian, statusi i Kosovës dhe mosdorëzimi i kriminelëve të
luftës ishin disa nga temat e takimit që u zhvillua sot në Romë ndërmjet kryeministrit
serb Vojisllav Koshtunica dhe ministrit të jashtëm italian Massimo D’Alema. Ministri
D’Alema theksoi se Italia do të vijojë të mbështesë Serbinë dhe të gjitha vendet ballkanike
në rrugën e integrimit si edhe uroi që negociatat për statusin e Kosovës të zhvillohen
në një klimë të përshtatshme dhe konstruktive.
Italia është skuadra e parë
finaliste e Botërorit 2006. Me fitoren e djeshme kundra Gjermanisë me rezultatin 2-0,
italianët shkojnë drejt finales që do të luhet me 9 korrik në Berlin, ku do të ndeshen
me skuadrën fituese të takimit Francë-Portugali, që po zhvillohet në këto çaste.