Papa lutet për viktimat e aksidentit të metrosë në Valencia, ku vijon Takimi Botëror
i Familjeve
(4.7.2006 RV)Benedikti XVI është pranë atyre që vuajnë për shkak të humbjes
të të dashurve në aksidentin e metrosë së Valencies, gjatë të cilit humbën jetën 41
vetë. . Pjesëmarrësit në Takimin Botëror të Familjeve luten për viktimat, që u salikuan
sonte në katedralen vendase. Ndërkaq, sot pasdite u hapën punimet e Kongresit teologjiko-baritor
me temë: “Familje, jetoje dhe transmetoje fenë”. Ati i Shenjtë – njofton një
notë e drejtorit të Sallës së Shtypit të Vatikanit, Joakin Navarro Valls - u vu menjëherë
në dijeni për aksidentin tragjik dhe i ndoqi me shqetësim të thellë lajmet dramatike
që arrinin nga Valencia, ku Papa do të niset të shtunën për të marrë pjesë në Takimin
V Botëror të Familjeve. Shenjtëria e Tij – vijon nota - u lut për viktimat, për familjet
e tyre dhe për të gjithë ata që jetuan tronditjen e këtij aksidenti. Në mbrëmje
Ati i Shenjtë i dërgoi një telegram ngushëllimi Kryeipeshkvit të Valencies, Imzot
Agustin García-Gasco Vicente, përmes të cilit shpreh dhimbjen për familjet e viktimave,
duke i siguruar se lutet që Zoti t’i ngushëllojë të gjallët e t’i pranojë në jetën
e amshuar shpirtrat e të vdekurve. Tragjedia e metrosë i tronditi thellë të gjithë
ata që janë mbledhur, nga mbarë bota në Takimin Botëror të Familjeve e që presin,
plot emocion, arritjen e Atit të Shenjtë. Megjithatë, veprimtaritë vijojnë. Sot
pasdite, pranë Qendrës së Panairit valencian, nisën punimet e Kongresit teologjik-baritor
me temë “Transmetimi i fesë në familje” në të cilin marrin pjesë 5 mijë vetë. Dita
e parë përfundoi me përshëndetjen e kardinalit Truhiljo, kryetar i Këshillit Papnor
për familjen. E njëkohësisht, në të gjitha kishat u mbajtën takime lutjeje, u
thanë rruzare e u kremtuan Meshë shenjte për shpirtrat e viktimave. Ndërkaq Fondacioni
organizator i takimit të familjeve njoftoi se i ka ndërprerë të gjitha manifestimet
e festës, duke iu përgjigjur vendimit të autoriteteve vendore e kishtare për të shpallur
tri ditë zije. Por, të kthehemi tek Kongresi teologjiko-baritor, për të cilin nga
na flet sekretari i Këshillit Papnor për Familjen, kryeipeshkvi Karl Romer: Përgjigje:
- Kemi dy perspektiva themelore shumë të rëndësishme: nga njëra anë bëhen përpjekje
për t’i dhënë familjes një shpirt të ri, një gëzim të ri, një vetëdije të re për mundësitë
e detyrat e saj; nga ana tjetër, për t’i transmetuar një fjalë shoqërisë, që nuk e
kupton si duhet vlerën dhe thesarin që përfaqëson familja. Pra, nga njëra anë duam
të përtërijmë familjet, duke u dhënë motivime të reja, nga ana tjetër, t’i çojmë
një mesazh të fortë dhe të qartë mbarë shoqërisë njerëzore. Duhet t’u krijojmë
të gjithëve vetëdijen se familja përfaqëson qelizën themelore të shoqërisë; e këtë
vetëdije duhet ta kenë në radhë të parë vetë familjet. Ka rëndësi që këtë ta pohojnë
të gjithë, e jo vetëm Papa e meshtarët. Duhet të luftojmë të gjithë që vetëdija publike
ta kuptojë vlerën e familjes, e cila duhet ungjillëzuar, duhet përtrirë vazhdimisht
në vetvete, për t’u bërë pastaj ungjillëzuese, për t’ua transmetuar edhe të tjerëve
Ungjillin e Krishtit. Pyetje: - Mbrojtja e familjes – ka thënë Papa, nuk është
thjeshtë çështje konfesionale, por diçka që u intereson të gjithëve. Si mund të bashkohen
besimtarët dhe jo besimtarët në mbrojtje të familjes? Përgjigje: - Është
interesant fakti se Gjon Pali II, në të gjithë dokumentet e tij – që janë shumë të
pasur, që nga enciklikat - tek letrat – kushtuar familjes, rrallë herë flet për shenjtërinë
e martesës: flet më tepër për atë që është e përbashkët për të gjithë burrat, për
të gjitha gratë, për vlerën e njeriut në përgjithësi. Gjon Pali II e pas tij edhe
Benedikti XVI, dëshirojnë të tregojnë se realiteti i familjes është pasuri që i takon
njeriut e prandaj Kisha, kur mbron familjen, nuk mbron interesat veta, por ato të
mbarë njerëzimit. Prandaj mund të themi se Kisha radhitet përkrah të gjithë njerëzve
vullnetmirë në luftën për mbrojtjen e këtij ideali.