(3.7.2006 R.V.)Rritet ankthi në Lindje të Mesme për jetën e ushtarit të rrëmbyer
izraelit. Sot Hamasi njoftoi se do ta lirojë me kusht që izraelitët të lënë të lirë
ministrat dhe deputetët të arrestuar nga ushtria javën e kaluar, por ultimatumi u
hodh poshtë nga qeveria izraelite. Lidhur me këtë çështje ministri izraelit i mbrojtjes
Perec tha se vendi i tij fajëson Sirinë për marrjen peng të ushtarit Xhilad Shalit.
Janë
shtatë viktimat e autobombës që tronditi qytetin e Mosulit në Irak. Objektivi i rebelëve
ishte një makinë e policisë irakiane. Pak orë më vonë tre persona mbetën të vrarë
në një atentat tjetër, në tregun e qytetit të Mahmudijes, në jug të Bagdadit.
Edhe
në Sri Lankë pati atentate të reja. Tashmë ka disa javë që kanë rifilluar atentatet
kundra qeverisë së Kolombos. Sot të paktën tre persona humbën jetën nga shpërthimi
i një bombe në hyrje të qytetit të Trinkomalesë, zonë e populluar nga etnia Tamil.
Sot
paradite në Kamboxhia nisi procesi gjyqësor ndaj drejtuesve dhe përfaqësuesve të Kmerëve
të Kuq, të akuzuar për genocid dhe vrasjen e rreth 2 milionë personave, një e treta
e krejt popullsisë. Rregjimi komunist i Kmerëve të Kuq të udhëhequr nga Pol Poti,
qeverisi vendin nga viti 1975 deri në 1979.
Somalia distancohet nga Al
Kaeda. Pas Oborreve Islamike, që muajin e kaluar pushtuan kryeqytetin Mogadisho, edhe
qeveria e tranzicionit deklaroi se nuk e përshëndet mesazhin e fundit të Bin Ladenit,
i cili u kërkon myslimanëve të mos lejojnë forca të huaja të ndërhyjnë në këtë vend
afrikan. Ndërkaq, Bashkimi Afrikan në mbledhjen e radhës vendosi dërgimin e një force
paqëruajtëse në Somali.
Pritet që me 24 korrik zëvendëskomisioneri i BE-ian
Franco Frattini t’u paraqesë ministrave të jashtëm të 25 vendeve që bëjnë pjesë në
BE-ian, një plan të hollësishëm për liberalizimin e vizave për Ballkanin perëndimor.
Kushti themelor është që këto shtete të pranojnë “Konventën për ripranimin e personave”.
Shqipëria është i vetmi shtet ballkanik që e ka nënshkruar deri tani këtë konventë.