Doli nga spitali Andolu në Samsun të Turqisë, prifti katolik francez Pierr Brunisen,
që u plagos dje për shkaqe që nuk janë sqaruar ende
(3.7.2006 RV)Meshtari katolik u godit mbrëmë me thikë në kofshë e në ijë. Njeriu,
që e goditi, u arrestua menjëherë dhe iu nënshtrua hetimeve nga policia dhe gjykata.
Është hera e tretë që në Turqi sulmohen priftërinjtë katolikë. Kujtojmë se më 5 shkurtin
e kaluar në Trabizon u vra dom Andre Santoro, ndërsa katër ditë më pas, në Smirnë,
u plagos dom Martin Kmetek. Kjo ngjarje e re, sipas mendimit të kryetarit të Konferencës
Ipeshkvnore Katolike turke, Imzot Rugjero Fraçeskinit, mund të krijojë pengesa
serioze për hyrjen e Ankarasë në Bashkimin Evropian. Prelati, që e vizitoi sot priftin
e plagosur, shprehet kështu në një intervistë dhënë Radio Vatikanit: Përgjigje:
- E vizitova sot në mëngjes heret, në spitalin e Samsunit. E gjeta të qetë, pa
pikë frike. Natyrisht i dhimbnin shumë plagët e hapura me thikë në ije e në kofshë.
Ai vetë më tha: “Nuk është kjo Turqia e vërtetë. Turqia e vërtetë ka fytyrë tjetër,
të tjera ndjenja”. Mbeta krejtësisht i habitur nga këto fjalë: pikërisht ai, i plagosuri,
po më thoshte fjalë që përputheshin plotësisht me bindjet e mia. Pyetje: - Don
Pierri nuk e urren njeriun që e plagosi, përkundrazi, e fal. Mendoj se një sjellje
e tillë duhet t’i prekë thellë ndërgjegjet e njerëzve?Përgjigje: - Sigurisht.
Kjo sjellje i pëlqen shumicës së njerëzve. Megjithatë nuk mund të them se deri në
ç’masë mund të ndikojë mbi ata njerëz të cilët janë të lidhur ngusht me fondamentalizmin
e të mbushur plot me idenë se Perëndimi duhet shkatërruar.