Tregtia e paligjshme e armëve të lehta është kërcënim për paqen dhe për zhvillimin
e popujve - theksoi kryeipeshkvi Çelestino Miliore në OKB
(30.6.2006 RV)Imzot Çelestino Miliore, Vëzhgues i përhershëm i Selisë së Shenjtë
pranë OKB-së në Nju Jork, foli këto ditë në asamblenë e 60-të të përgjithshme të
Kombeve të Bashkuara, e cila shqyrtoi progresin që është bërë për vënien në jetë të
programit të veprimit për çrrënjosjen e tregtisë ilegale të armëve të lehta. Selia
e Shenjtë kërkon përpjekje të përbashkët jo vetëm për të luftuar trafikun e paligjshëm
të armëve, por edhe veprimtaritë që lidhen me to, si terrorizmin dhe krimin e organizuar.
Këtë theksoi imzot Miliore në Pallatin e Qelqit, duke shtuar se armët nuk mund të
konsiderohen si mallra të zakonshme tregu. E kjo, sepse ekziston një lidhje e ngushtë
ndërmjet armëve dhe ushtrimit të dhunës, armëve dhe shkatërrimit. Prelati, duke folur
në emër të Selisë së Shenjtë, e mbështeti Programin e veprimit për çrrënjosjen e një
plage të tillë si dhe Deklaratën e Gjenevës mbi dhunën e armatosur dhe zhvillimin,
adoptuar më 7 qershorin e kaluar me impenjimin e 42 vendeve, që u zotuan të bëjnë
kontrolle më të thelluara mbi tregun e armëve. Imzot Miliore shtoi më pas se bashkësia
ndërkombëtare duhet të shfrytëzojë rastin për të rinjohur lidhjen që ekziston ndërmjet
çarmatosjes, zhvillimit dhe çështjeve humanitare. Prej këndej, ftesa drejtuar qeverive
që të impenjohen në programe e strategji, të cilat kufizojnë kërkesat për armë. Ky
treg ka një ndikim shkandullues mbi njerëzit më të ligësht e sidomos mbi fëmijët.
Prelati u ndalua pikërisht tek fëmijët, viktimat e para të konflikteve. Selia e Shenjtë
– deklaroi përfaqësuesi i Vatikanit – e ka shumë për zemër mbrojtjen e fëmijëve të
tronditur nga luftërat dhe e quan detyrë themelore ri-integrimin e fëmijëve-ushtarë
në shoqëri si dhe bashkimin me familjet e tyre. Do të ishte e nevojshme- shtoi
prelati- të mendohej për një mjet ligjor lidhur me kontrollin e trafikut të armëve
të lehta, bazuar mbi parimet kryesore të ligjit ndërkombëtar, siç janë të drejtat
njeriut dhe e drejta humanitare. Në këto rrethana – përfundoi Imzot Miliore – Selia
e Shenjtë mbështet propozimin e qeverisë britanike mbi transferimet e armëve konvencionale.
Kujtojmë se këto ditë në Romë, Fushata për Kontrollin e Armëve, ka paraqitur
dy dosje mbi tregtinë e armëve të lehta. Ndër dosje pasqyrohen shifrat që kanë të
bëjnë me sasinë e armëve të tregtuara, me tipologjinë dhe qarkullimin marramendës
të parave në tregun e armëve. Këto armë njihen me emrin “civile”, sepse do të duhej
të përdoreshin për sport ose për mbrojtje personale, por pastaj përdoren ndër konflikte.