Perspektiva për kthimin e motrave të Nënë Terezës në Vietnam
(21.6.2006 R.V.)Ka mundësi që rregulltarët dhe rregulltaret e Nënë Terezës
të kthehen përsëri në Vietnam, ku dëshirojnë të jenë të pranishëm prej shumë vitesh. Pritet
që të rifillojnë veprimtaritë e tyre shoqërore e baritore në vendin aziatik, prej
nga u detyruan të largohen disa vjet më parë. Sipas AziaNjuz, kjo përspektivë u hapet
pas vizitës të Eprores së Kongregatës, Motër Nirmalës, në dioqezën e Hanoit, ku u
takua edhe me përfaqësues të qeverisë, që përgjigjen për politikën fetare në vend,
të cilët i propozuan rregulltares të përgatisë një projekt për veprimtaritë që mendon
se mund të zhvillojë Kongregata në vend. Ky projekt do t’i paraqitet më pas Komitetit
për Çështjet fetare dhe Departamentit për punëtorët, invalidët dhe Çështjet shoqërore.
Motër Maria Fransua Ha Thanh Tinh e Kongragtës ‘Dashuria e Jezusit’, aktive në Vietnam
- duke folur për AziaNJuz, pohoi se një nëpunës i rëndësishëm shprehu mendimin se
qeveria e ka ndër mend t’ua hapë rrugën motrave të Nënë Terezës dhe ta mbështesë veprimtarinë
e tyre në Vietnam. Kujtojmë se Motrat e Bamirësisë nuk kanë pasur kurrë ndonjë
shtëpi të tyren në Vietnam e dëshira e tyre për të qenë të pranishme, është kundërshtuar
gjithnjë nga qeveria. Në vitin 1974 ipeshkvi i asokoshëm i Saigonit, imzot Van Binh,
e pati ftuar Nënë Terezën të fillonte veprimtaritë e saj baritore e shoqërore në kryedioqezën
e tij. Kështu disa Vëllezër Misionarë të Dashurisë patën nisur të punonin me të gërbulurit,
të varfërit, të pastrehët, të braktisurit e fëmijët pa prindër. Por në vitin 1975,
me fitoren e komunistëve, rregulltarët u dëbuan së bashku me të gjithë meshtarët e
murgeshat. Gjatë udhëtimit në Vietnam, motër Nirmala deshi të prekte me dorë disa
nga realitetet më dramatike në Vend, por edhe të krijonte një ide të saktë për projektet
e ndihmës që po çohen përpara nga Kongregata e Dashurisë së Jezusit. Në zonën Song
Than – tregon Motër Maria Fransua - ka shumë gra që kanë ardhur nga dioqezet e veriut
e të qëndrës për të fituar jetesën. Për shkak të mjerimit të thellë, përfundojnë si
viktima të shfrytëzimit seksual. U shkatërrohet jeta e, prej këndej, kanë nevojë për
ndihmë psikologjike e shpirtërore. Prandaj – pohon rregulltarja – në se qeveria është
vërtetë e interesuar për çështjet shoqërore, mund t’i japë një ndihmë serioze popullisë
së vet, po t’i lejojë rregulltaret e rregulltarët të zhvillojnë veprimtari shoqërore. Motrat
e Nënë Terezës aktualisht kanë shtëpi misionare në 120 vende të botës, duke përfshirë
të gjitha vendet ish-komuniste, që nga ish-Bashkimi Sovjetik, tek Shqipëria e Kuba.