(16.6.2006 R.V.) Sot në
ditën e dytë të vizitës zyrtare që po zhvillon në Kosovë, kryeministri Sali Berisha
vizitoi Prekazin, ndërsa Bashkia e Prishtinës e shpalli kryeministrin e Shqipërisë
qytetar nderi. Më hollësisht nga Prishtina na informon korrespondentja jonë Rabije
Ibraj...
Në mbledhjen e radhës në Bruksel, 25 kryeministrat e BE-ian
vendosën të zgjerojnë zonën “euro”. Kështu, duke filluar nga janari i 2007-ës monedha
në qarkullim në Slloveni do të jetë euroja, ndërsa Lituania duhet të presë derisa
çmimet e mallrave në këtë vend të mos kenë luhatje. Po ashtu qeveritë e BE-ian u treguan
të gatshme t’i japin Autoritetit Kombëtar Palestinez një ndihmë prej 100 milionë
eurosh.
Një tjetër atentat në xhamitë e Bagdadit. Sot një ditë pas deklaratës
së qeverisë irakiane se Al Kaedës në Irak po i vjen fundi, një kamikaze u hodh në
erë në xhaminë shiite Buratha duke vrarë 11 persona dhe plagosur 25. Dy muaj më parë
po në këtë xhami ishin vrarë nga një shpërthim 80 vetë. Edhe këtë herë terroristët
zgjodhën të premten, ditë lutjesh, për të shkaktuar tmerr.
“Nuk po përpiqemi
të ndërtojmë armë bërthamore.” – tha presidenti iranian Ahmadinexhad në një konferencë
për shtyp mbajtur në Pekin, ku gjendet me cilësinë e vëzhguesit të Organizatës për
Bashkëpunim. Më pas presidenti iranian shtoi se propozimet për ndihma të pesë anëtarëve
të përhershëm të OKB-së dhe Gjermanisë, përbëjnë “një hap përpara”, por nuk sqaroi
a do të pranohen nga vendi i tij.
Dy ministrat e mbrojtjes të Sirisë dhe
Iranit, Hasan Turkmani dhe Mustafa Nazhari nënshkruan sot në Damask marrëveshjen për
bashkëpunim ushtarak. “Pakti ynë bazohet mbi një strategji që ka si synim mbrojtjen
kundra rreziqeve të përbashkëta.”- tha për shtypin ministri sirian Turkmani.
Ministri
i Mbrojtjes i Libanit Eliaz Murr njoftoi se do të padisë Izraelin pranë Këshillit
të Sigurimit të OKB-së se mban një rrjet agjentësh në Liban. Agjentët izraelitë fajësohen
nga Libani se me 26 majin e kaluar kanë hedhur në erë në Sidon, në jug të Libanit,
një makinë ku gjendeshin dy anëtarë të Xhihadit islamik, që të dy shtetas libanezë.