15 чэрвеня адзначаецца свята Цела і Крыві Панскіх. У гэты дзень, вечарам, а 19 гадзіне
сярэдняеўрапейскага часу, Свяцейшы Айцец Бенедыкт XVI° узначаліць Святую імшу ў Латеранскім
саборы святога Яна. Потым Папа ўзначаліць Еўхарыстычную працэсію, якая пройдзе ад
згаданага сабора да базылікі св.Марыі Вялікай. З самага пачатку свайго знаходжання
на Пасадзе св. Апостала Пятра Бенедыкт XVI° заклікае вернікаў “да ўшанавання Езуса
ў Найсвяцейшых Таямніцах”. Асаблівы вопыт ушанавання Найсвяцейшай Еўхарыстыі належыць
рымскаму касцёлу св. Анастасіі, які знаходзіцца на адным з сямі рымскіх узгоркаў –
Палатіне. На працягу апошніх пяці гадоў гэты касцёл з’яўляецца месцам сталага ўшанавання
Найсвяцейшай Еўхарыстыі. З гэтай нагоды парах касцёла св. Анастасіі, айцец Альберто
Пачіні зазначыў, што гэты дар, багаты асаблівай любоўю, нараджаецца ў малітоўным спатканні
верніка і Пана, жывога і прысутнага ў Найсвяцейшай Еўхарыстыі. Таму, прыступаючы да
камуніі без малітвы і адпаведнага ўшанавання, мы губляем яе плён. Указваючы на
вопыт еўхарыстычнага ўшанавання ў касцёле св. Анастасіі, а. Альберо звярнуў увагу
на яго вынікі. Касцёл, які быў амаль пусты на працягу многіх гадоў, пад час Вялікага
Юбілея, на ягонай хвалі і як плён Юбілею Адкупіцеля, зрабіўся месцам трывалага еўхарыстычнага
чування. Ад таго часу, значыць ад сакавіка 2001 года, прайшло ўжо пяць гадоў пад дэвізам
слоў Свяцейшага Айца Яна Паўла II: “Плыві ў глыбіню!”. Зрабі крок да веры!” I там,
дзе мы адважыліся зрабіць гэты крок да веры, сапраўды, Хрыстус пераўзышоў усе нашыя
надзеі. Струмень людзей, якія прыходзяць у касцёл, каб ушанаваць Бога, не спыняецца
не днём, не ў начы. I не толькі гэта: ад касцёла св. Анастасіі нарадзілася шмат іншых
традыцый няспынных малітоўных чуванняў перад Найсвяцейшымі Дарамі па ўсёй Iталіі.