Пілігрымка венецыянскіх вернікаў-католікаў у Грэцыю.
Важна, каб усе хрысціянскія Цэрквы аб’ядналі свае намаганні і імкнуліся разам пераадоліць
непаразуменні, якія з’яўляюцца скандалам у вачах свету, - заявіў праваслаўны мітрапаліт
Афінскі Хрыстодулос, галава Грэцкай Праваслаўнай Царквы, пад час сустрэчы з каталіцкім
Патрыярхам Венецыі, кардыналам Анджело Скола, і групай з 50 пілігрымаў-венецыанцаў,
якія зараз знаходзяцца ў Грэцыі. Сустрэча прайшла ў вельмі сяброўскай і сардэчнай
атмасферы, падкрэсленай таксама дэлікатным і шматзначным рашэннем грэцкага Патрыярха,
які сядзеў на сваім троне галавы Царквы, але на адным узроўні з венецыанскімі гасцямі. У
сваім выступленні Патрыярх Хрыстодулос адзначыў, што Праваслаўная Царква ў Грэцыі
адыграла вялікую ролю пад час акупацыі краіны Асманскай імперыяй, баронячы права народа
на ўласную мову, баронячы хрысціянскую веру і падтрымліваючы надзею на вызваленне.
Менавіта ў святле гэтых падзей, - падкрэсліў Патрыярх, - робіцца зразумелым, чаму
сёння сярод народа, таксама і ў мадзёвых асяродках, захоўваецца моцная лучнасць з
Праваслаўнай Царквой, да якой належыць 98 % насельніцтва Грэцыі. У сваю чаргу,
кардынал Скола падзякаваў галаву Грэцкай Праваслаўнай Царквы за прыём і падкрэсліў
важнасць малітвы аб еднасці ўсіх хрысціянаў, каб яны мелі магчымасць разам сведчыць
аб Эвангеллі ў Еўропе і ва ўсім свеце. Патрыярх Венецыі адзначыў здольнасць Праваслаўнай
Царквы адэкватным чынам адказваць на пытанні мужчынаў і жанчынаў нашых часоў аб прыгажосці,
справядлівасці і свабодзе. На заканчэнні спаткання Патрыярх Хрыстодулос паведаміў,
што ідзе падрыхтоўка яго візіту ў Рым, пад час якога ён сустрэніцца са Свяцейшым Айцом
Бенедыктам XVI°.