U publikua sot programi i shtegtimit apostolik të Benediktit XVI në Valencia të Spanjës më 8 e 9 korrikun e ardhshëm, me rastin e Takimit V botëror të familjeve

( 12. 06. 06 R. V. ) Salla e Shtypit e Vatikanit publikoi sot programin e shtegtimit të ardhshëm apostolik të Papës në Valencia. Është shtegtimi i tretë apostolik i Benediktit XVI, pas atij në Këln, në gusht të vitit 2005 për Ditën Botërore të Rinisë e atij në Poloni, në majin e kaluar.
Papa do të niset nga Fiumiçino të shtunën, më 8 korrik, në orën 9.30. Ceremonia e mirëseardhjes do të zhvillohet në orën 11. 30 në aeroportin e Valencia-Manises. Më pas Benedikti XVI do të shkojë në bazilikën kushtuar “Virgen de los desamparados” për t’i drejtuar mesazhin e vet ipeshkvijve spanjollë. Në orën 13. 30 do të thotë lutjen e Engjëllit të Tënzot në Sheshin e Virgjërës. Pasdite do t’i bëjë një vizitë mirësjelljeje familjes mbretërore të Spanjës në Pallatin e Gjeneralitat dhe menjëherë pas, takimi, në Pallatin e Kryeipeshkvnisë, me kryeministrin spanjoll Josè Rodriguez Zapatero. Në orën 21. 00 do të shkojë në Qytetin e Arteve dhe të Shkencave për përfundimin e Takimit botëror të familjeve. Të dielën, më 9 korrik, do të kryesojë Meshën Shenjte, gjithnjë në Qytetin e Arteve e të Shkencave.
Benedikti XVI do të niset nga Valencia në orën 13. 30, për të arritur në areoportin romak të Çampinos rreth dy orë më vonë.