У Беларусі адкрыўся Міжнародны фэстываль хрысьціянскіх фільмаў
У вёсцы Ўдзела Глыбоцкага раёна распачаўся Міжнародны фэстываль хрысьціянскіх дакумэнтальных
фільмаў і тэлевізійных праграм «MAGNIFICAT 2006». Сьвята духоўнага кіно заснаванае
й праводзіцца пад кіраўніцтвам каталіцкага касьцёлу ў Беларусі й адбываецца другі
год запар. Конкурсныя прагляды ды імпрэзы ў гонар Яна Паўла ІІ пройдуць таксама ў
вёсцы Мосар і іншых месцах Віцебшчыны. Сёлетні фэстываль адзначаны павелічэньнем колькасьці
краінаў-удзельніцаў і конкурсных кінастужак.
Сьвята кіно распачалося
ўрачыстым набажэнствам у вёсцы Ўдзела, у мясцовым кляштары манахаў-францішканаў. Месца
правядзеньня арганізатарамі выбрана не выпадкова: аналягічны фэстываль праводзіцца
ў гэткім жа мястэчку Непакалянаў у Польшчы, . У фэстывалі хрысьціянскага кіно
ад Беларусі ўдзельнічае фільм Уладзімера Бокуна з сэрыі “Лёс чалавека”, Станіслава
Гайдука “Пад крылом анёла” ды іншыя. І хоць гэтая традыцыя ў Беларусі яшчэ распачынаецца,
можна рабіць выснову, што фэстываль ёсьць ня толькі творчым спаборніцтвам, кажа старшыня
журы, пісьменьніца Крысьціна Лялько.
“Тое, што гэта ўнёсак у нашую
духоўнасьць, у разьвіцьцё гэтай духоўнасьці, то гэта адназначна. У гэтым фэстываль
і мае сваё значэньне”' дадала яна.
Арганізатары Міжнароднага фэстывалю
духоўнага кіно яшчэ ў мінулым годзе плянавалі паказаць конкурсныя работы ў касьцёлах
і кінатэатрах Беларусі. Гэтага зрабіць не ўдалося, але яны не пакідаюць спадзяваньняў
зрэалізаваць задуму сёлета.