(8/6/2006 R.V.)Terroristi jordanez
Al Zarkavi, udhëheqësi i Al Kaedës në Irak, u vra gjatë një operacioni ushtarak amerikan
dje pasdite, në afërsi të Bakubës. Lajmin e dha i pari kryeministri i Irakut Al Maliki.
Gjithashtu edhe Al Kaeda me një komunikatë për televizionin shtetëror egjiptian e
pranoi se kryetari i saj mbeti i vrarë dje gjatë një bombardimi të amerikanëve. Lajmi
u konfirmua edhe nga Shtëpia e Bardhë. Duke folur në një konferencë për shtyp presidenti
amerikan Xhorxh Bush, tha se Al Zarkavit i erdhi fundi. “Vdekja e tij i jep Irakut
një shans të ri për të ndryshuar rrjedhën e luftës kundra terrorizmit. Ideologjia
e terrorit humbi një nga udhëheqësit e saj më të dukshëm dhe agresivë. Vdekja e Zarkavit
është një goditje e rëndë për Al Kaedën”- shtoi ndërmjet tjerash presidenti Bush.
Sidoqoftë pa kaluar veçse pak minuta, në muret e xhamive të Ramadit u shfaqën
afishe ku lexohej se një tjetër do t’i zërë vendin Al Zarkavit si kryetar i Al Kaedës. Përveç
vrasjes së Al Zarkavit dita e sotme në Irak ishte e shënuar edhe pse qeveria e re
e Al Malikit mori miratimin e parlamentit. Kështu, gjashtë muaj pas zgjedhjeve të
para demokratike në vend, Iraku ka një qeveri demokratike. Po, sa do të ndikojë
vrasja e Al Zarkavit në aksionet e guerrilasve irakianë? Përgjigjet Guido Olimpio,
ekspert i terrorizmit i gazetës “Il Corriere della Sera”
Përgjigje:
Përsa i përket guerriljes nacionaliste irakiane, nuk ndryshon asgjë, në kuptimin që
guerrilja ka kohë që vepron sipas llogarisë së vet, ka një program të vetin, një
lëvizje të vetën, madje kohët e fundit ka patur edhe mosmarrëveshje me Al Zarkavin.
Është më interesante të dihet se çfarë do të ndodhë tani brenda lëvizjes xhihadiste.
Në përgjithësi këto grupe janë shumë të afta që të riorganizohen e të emërojnë një
kryetar të ri, që fatkeqësisht e në mënyrë të pashmangëshme duhet të bëjë emër me
masakra të reja. Nuk është e lehtë të zëvendësosh një si Al Zarkavi, jo aq në vështrimin
ushtarak sa si figurë dhe si simbol.
Pyetje: Po në brendësi të Al Kaedës?
Përgjigje:
Nuk jam i mendimit se rrjeti i i terrorizmit do të ketë goditje të mëdha. Al Kaeda
është mësuar t’i humbasë udhëheqësit e vet. Do të kërkojë masakra të reja për të treguar
se është gjallë. Por nuk mundem të përjashtoj faktin se brenda saj ka mosmarrëveshje,
kontraste, përçarje, të cilat madje kanë lënë edhe gjurmë në historinë e Al Kaedës
në Irak.
Pyetje: Si do të kujtohet Al Zarkavi në strategjinë e luftës kundër
terrorizmi?
Përgjigje: Do të kujtohet si prerës kokash, si një gjaksor,
si një terrorist që futi në botë një mënyrë të tmerrshme luftimi, si një që për fat
të keq po imitohet nga të tjerë. Por kam frikë se mos ndonjë do të na bëjë ta harrojmë
me veprime edhe më gjakësore e më të bujshme [se ato të tijat].
Kryeministri
izraelit Ehud Olmert u prit sot në Aman nga mbreti i Jordanisë, Abdullahu II. Pas
takimit, që zgjati një orë, kryeministri Olmert deklaroi se brenda muajit qershor
do të takohet edhe me presidentin palestinez Abu Mazen. Ndërsa mbreti Abdullah përsëriti
se zgjidhja e problemit të Palestinës do të arrihet vetëm me bisedime dypalëshe ndërmjet
Tel-Avivit dhe Autoritetit Kombëtar Palestinez.
Një delegacion i qeverisë
së Somalisë mbërriti në Mogadishu për të hapur bisedimet me rebelët islamikë, të cilët
ditët e fundit pushtuan edhe kryeqytetin e vendit. Megjithëse trupat ushtarake qeveritare
po u kundërpërgjigjen rebelëve, gjendja nuk ka pësuar ndryshime rrënjësore.
Parlamenti
leton dha pëlqimin e vet për publikimin e emrave të rreth 4 mijë të dyshuarve si ish-agjentë
të KGB-së. Vendimi i parlamentit u miratua me 59 vota pro dhe 18 kundra. Emrat do
të botohen nga gazeta zyrtare letone me 1 nëntor të këtij viti.