Shqiptarët të udhëhequr nga Imzot Rrok Mirdita shtegtuan sot më 28 maj në Gjenacan
tek fugurja e Zojës së Këshillit të Mirë, Pajtorja Qiellore e Kombit Shqiptar.
(28.05.06.R.V.)
Sot në Gjenacan, afër Romës, u zhvillua shtegtimi i përvjetshëm i shqiptarëve
në Shenjtëroren e Zojës së Këshillit të Mirë. Sikurse tashmë është bërë traditë,
të dielën e fundit të muajit maj, shqiptarët ia kushtojnë një shtegtimi shpirtëror
në Kishën e Zojës së Këshillit të Mirë. Besimtarët kishin ardhur që nga Lombardia,
Venetoja, Umbria, përfshi dhe Lacion, Toskanën për t’u takuar me Nënën Shpirtërore
të kombit shqiptar, asaj Nëne që në shekujt e errët të pushtimit otoman ipeshkvijtë
shqiptarë i besuan fatin e kishës dhe jetën e popullit katolik shqiptar. Për të nënvizuar
këtë lidhje jo vetëm të popullit por edhe të klerit katolik shqiptar me Nënën e Këshillit
të Mirë, kishte ardhur posaçërisht nga Tirana edhe kryeipeshkëvi i Tiranë-Durrësit
Imzot Rrok Mirdita. Këtë vit shtegtimi ndryshe nga vitet tjera ishte konceptuar
si një pjesëmarrje e gjallë e të gjithë shqiptarëve. Nën kujdesin e misionarit Don
Antonio Sharra, në Shqipëri ishte përgatitur Arka që përmbante të gjitha lutjet e
familjeve shqiptare, të cilat janë mobilizuar të zbatojnë fjalët e Atit të Shenjtë
Gjon Palit II, i cili i pat nxitur të gjithë të krishterët që të mbrojnë familjen.
Këtyre lutjeve në momentin e paraqitjes së Arkës përpara besmitarëve iu shtuan lutjet
e emigrantëve shqiptarë që jetojnë jashtë atdheut. Arka e Besëlidhjes, quajtur kështu
sipas Litanive të Zojës, para se të vijë në Itali kishte përshkuar Shqipërinë. Ndërsa
në Itali rruga e saj ka filluar nga Piemonti, Lombardia, Toskana duke u ndalur në
çdo famulli ku ka bashkësi shqiptare, për të arritur sot (28 maj) në Gjenacan. Pas
një procesioni të shkurtër — të cili i printe banda e qytetit të Gjenacanit, dashamirësisht
vënë në dispozicion nga bashkia, fugurja e madhe e Zojës së Këshillit të Mirë, Arka
e Besëlidhjes, — meshtarët e shumtë me në krye Imzot Rrok Mirditën, të ndjekur nga
besimtarët katolikë shqiptarë por edhe të besimeve të tjera, hynë në kishë. Mbas
leximeve biblike të liturgjisë së Fjalës së Zotit të festës të ditës së sotme, Imzot
Rrok Mirdita mbajti homelinë e rastit. Mes tjerash Imzoti theksoi se mërgimtarët
nuk janë vetëm. Mërgimtarja e parë ishte Zoja e Shkodrës, e cila u parapriu shqiptarëve
dhe u dha zemër gjatë shekujve të errët të pushtimit të huaj. Mërgimtarët që kanë
lënë vendin e tyre për një punë, për bukën e gojës, për një shkollim më të mirë të
fëmijëve të tyre, kanë lënë atdheun për një vend që nuk është toka e tyre. Por ky
është një shtegtim në të cilin na prin Zoja e Këshillit të Mirë, është shtegtimi që
do të përfundojë me arritjen tonë në jetën e pasosme, në atë që është atdheu ynë i
vërtetë. “Ardhja jonë sot — këtu shtoi Imzot Mirdita, është vetëm një ndalesë për
të gjetur pak çlodhje në prehrin e Zojës së Bekueme, në atë prehën që priti aq e aq
herë Birin e saj, Zotin tonë të Ngjallur Jezu Krisht. Në përfundim të meshës, Dom
Paskuale Ferraro, rektori i kishës së Shën Gjonit të Malvës, falenderoi Imzot Mirditën,
që tashmë është edhe kryetar i Konferencës Ipeshkvnore Shqiptare, falenderoi Dom Antonio
Sharrën si edhe të gjithë të pranishmit që morën pjesë në shtegtim. Festa e sotme
u mbyll me drekën e shoqëruar me këngë e valle shqiptare nën hijen e pishave. Këtu
mund të ndiqni regjistrimet të drejtëpërsëdrejti nga shtegtimi i shqiptarëve në Gjenacan
realizuar nga Arben Marku