У сталіцы Польшчы пачала працаваць інфармацыйная лінія па падрыхтоўцы візыту Папы.
Пры яе пасрэдніцтве жадаючыя прыняць удзел у імшы, якую 26 траўня ўзначаліць Свяцейшы
Айцец Бенедыкт XVІ у Варшаве, 24 гадзіны ў суткі могуць атрымаць разнабаковую інфармацыю,
што мае дачыненне да будучага візыту. Чакаецца, што 26 траўня на пляцы Пілсудскага
ў Варшаве будзе маліцца больш за 100 тысяч чалавек, а ў прылягаючых вулачках збярэцца
больш за мільён пілігрымаў. Як зазначыла адна з адказных за інфармаванне пілігрымаў,
спадарыня Гражына Меленовіч, апрача інфармацыйнай лініі дапамогу можна будзе атрымаць
таксама непасрэдна на месцы. Па словах спадарыні Меленовіч, падчас пілігрымкі
Свяцейшага Айца ў Варшаву будзе працаваць таксама Цэнтральны пункт згубленых дзяцей.
Будуць арганізаваныя два пункты для тых, каму спатрэбіцца дапамога, дзе людзі будуць
мець магчымасць атрымаць месца для адпачынку і пасілак. Кожны пілігрым атрымае
спецыяльнае друкаванае выданне, якое падрыхтоўвае Варшаўская курыя. 26 траўня ўдзельнікаў
імшы на плошчы Пілсудскага будуць давозіць бясплатныя аўтобусы.