Në lutjen e Mbretëreshës Qiellore, pas kremtmit të djeshëm në Bazilikën e Shën Pjetrit,
Benedikti XVI falënderoi Zotin për meshtarët e rinj të sapo shuguruar në Ditën botërore
të lutjes për thirrjet meshtarake
( 08. 05. 06 R. V. )Dje gjatë uratës së Mbretëreshës Qiellore, Papa Benedikti XVI
u lut kryesisht për thirrjet meshtarake, në ditën Botërore kushtuar atyre. Dje
Papa e tha lutjen e Mbretëreshës Qiellore menjëherë pas kremtimit në bazilikën e Shën
Pjetrit, ku kishte shuguruar 15 diakonë. Prandaj falënderoi Zotin për meshtarët e
rinj të saposhuguruar në Ditën botërore të lutjes për thirrjet meshtarake. Duke i
kujtuar turmës vigane, mbledhur poshtë dritares së studios së tij private, rëndësinë
që ka çdo thirrje brënda Kishës – që nga ajo e familjes, tek thirrja për t’ia kushtuar
gjithë jetën Zotit e të afërmit, Papa ripohoi lidhjen e ngushtë të jetës së krishterë
me sakramentet që - theksoi Ati i Shenjtë – e përtërijnë miqësinë personale me Krishtin.
E, duke marrë shtytje nga mesazhi i tij për ditën e djeshme të lutjes, Papa shtoi: “Ja
pse – siç kam pohuar në mesazhin e rastit – misioni i meshtarit është i pazevendësueshëm,
e edhe në se ndër disa zona vërehet mungesë kleri, nuk duhet dyshuar se Hyji do të
vijojë të thërrasë djem, të rinj e të rritur që të lenë gjithçka, për t’iu kushtuar
predikimit të Ungjillit dhe misionit meshtarak”. Në çastin e përshëndetjeve
në shumë gjuhë, ndërmjet tjerëve, Benedikti XVI iu drejtua posaçërisht familjarëve
dhe miqve të Rojeve Zvicerane – këto ditë në qëndër të kremtimeve me rastin e 500-vjetorit
të themelimit të tyre, si dhe anëtarëve të policisë të Shtetit Italian, që kremton
154 vjetorin e shërbimit.