Sot pasdite, në orën 17, Papa Benedikti XVI përshëndeti nga dritarja e studios së
tij private, ish-rojet zvicerane, që organizuan “Marshimin përkujtimor” nga Belinzona
në Romë për të kujtuar hyrjen e ushtarëve të parë helvetikë në Vatikan 500 vjet më
parë.
( 04. 05. 06 R. V. )Ishte viti 1506 kur një grup ushtarësh helvetikë iu betua
për besnikëri Papës Juli II, duke marrë edhe Bekimin e tij Apostolik. Pikërisht
këtë ngjarje kujtoi Papa Racinger gjatë përshëndetjes së tij në të trija gjuhët kryesore
që fliten në Zvicër: italisht, gjermanisht e frëngjisht, duke ndjekur simbolikisht
të dy marshimet: 1506- 2006 nga Zvicra, në Milano, Fidenca, Luka, Siena, Akuapendente,
Romë, Sheshi i Shën Pjetrit, të cilin rojet e njohin shumë mirë. Për t’ju pritur –
shtoi Ati i Shenjtë - asokohe kishte dalë Papa Juli II, emri i të cilit lidhet ngusht
me Rojet zvicerane. Më pas, duke përshëndetur në gjuhën gjermane, Ati i Shenjtë,
shtoi hollësi të reja të historisë së themelimit të Rojes zvicerane, ndërsa në gjuhën
frënge kujtoi faqen e rëndësishme të historisë së Kishës, që Rojet zvicerane e shkruan
me gjak, duke mbrojtur Papën. Duke sintetizuar 500-vjet histori, Ati i Shenjtë falënderoi
Zotin për shërbimin që i kanë bërë e vijojnë t’i bëjnë Selisë Apostolike Rojet zvicerane,
përshëndeti posaçërisht Shoqatën e Rojeve veterane dhe u dha të gjithëve Bekimin e
vet Apostolik. Kremtimet për 500-vjetorin e themelimit të Rojës zvicerane u hapën
mbrëmë në Sallën e Palit VI me një koncert të Bandës Ushtarake Zvicerane. Sonte,
në Kishën romake të Shën Injacit u shfaq legjenda muzikore dramatike “Nikolas Flu”,
ndërsa nesër mbrëma, në Sallën e Palit VI do të mbahet ceremonia zyrtare e Jubileut
të Rojes zvicerane Së fundi, të shtunën paradite, në bazilikën e Shën Pjetrit Papa
Benedikti XVI do të kryesojë për rojet e tij, Meshën në Bazilikën e Shën Pjertit,
ndërsa pasdite do të bëhet betimi i rekrutëve të rinj. Kremtimet do të mbyllen
mbrëmjen e së shtundes me një festë fishekzjarresh e tingujsh muzikorë në Sheshin
e Shën Pjetrit.