Lajme shoqërore-politike: 2 maj

U mblodh sot në Paris grupi i pesë vendeve me të drejtë vetoje në OKB, përfshi edhe Gjermaninë, për të diskutuar mbi masat që duhen marrë tani që ultimatumi ndaj Iranit skadoi. Takimi ka për synim hartimin e një dokumenti që do t’u paraqitet ministrave të jashtëm të BE-së në mbledhjen e caktuar për 9 maj në Nju Jork. Ndërkaq, Irani kërcënoi SHBA-ës se do të bombardojë Izraelin në rast se ndëshkohet nga OKB-ja.


Kryeministri izraelit Ehud Olmert do t’i paraqesë të enjten parlamentit përbërjen e qeverisë së re. Ndërmjet emrave të tjerë, bie në sy ai i Tzipi Livnit, si zv/kryeministre dhe ministre e jashtme. Është hera e parë në historinë e politikës izraeliane që një grua caktohet në poste kaq të larta


Në Aduzha të Nigerisë po zhvillohen bisedime të ethshme për armëpushim në zonën e Darfurit, në jug të Sudanit. Sekretari i përgjithshëm i OKB-së Kofi Anan u bëri thirrje palëve ndërluftuese të ulura në tavolinë të bisedimeve, të nënshkruajnë sa më shpejt një marrëveshje.


Ekstremistët islamikë algjerianë të grupit salafit i bënë thirrje Al Zarkavit, kryetarit të Al-Kaedës në Irak, që të nxisë popullin algjerian për përmbysjen e qeverisë aktuale. Letra u përhap në internet si edhe u botua nga gazeta arabe A-Shark- Al-Ausat.


Një ushtar amerikan u vra të hënën, nga një bombë e rebelëve në Bagdad, Irak. Shpërthimi ndodhi ndërsa makina ku gjendej ushtari po përshkonte një rrugë në jug të kryeqytetit. Kjo është viktima e 2406-të në radhët e ushtrisë amerikane që pas përmbysjes së Sadam Hyseinit.


Tiranë. Duke folur në seancën e sotme të parlamentit, kushtuar shkarkimit të prokurorit të përgjithshëm Theodhori Sollakut, kryeministri Berisha i bëri thirrje opozitës që të denonconte çdo rast korrupsioni ndër radhët e mazhorancës. Më tej, duke folur për kryeprokurorin e ri, Berisha tha se ai mund të caktohet edhe nga vetë opozita.


Grupi negociator i Kosovës miratoi dokumentin final me të cilin do të paraqitet në bisedimet e 4 dhe 5 majit në Vjenë. Sipas këtij dokumenti pala kosovare do të lejojë krijimin e dy njësive komunale në Mitrovicë si edhe ngritjen e disa të tjerave përqark këtij qyteti. Gjithashtu Grupi negociator është shprehur se nuk do të pranojë bisedime, që cënojnë karakterin unitar të Kosovës.