Të mohosh Ringjalljen e Krishtit do të thotë ta bësh të kotë fenë tonë. Këtë kujtoi
Papa në lutjen e Mbretëreshës Qiellore
( 01. 05. 06. R. V. )Të mohosh Ringjalljen e Krishtit do të thotë ta bësh të kotë
fenë tonë. Këtë kujtoi dje Benedikti XVI, i cili gjatë lutjes së Mbretëreshës Qiellore
nënvizoi se Zoja e Bekuar është Nëna dhe Mësuesja e mbarë të krishterëve, në të gjitha
kohërat. Ngjallja e Krishti është zemra e fesë sonë; është një e vërtetë që
duhet të shpallet me forcë: këtë pohoi dje Benedikti XVI gjatë lutjes së Mbretëreshës
Qiellore në Sheshin e Shën Pjetrit që ishte mbushur me shtegtarë e besimtarë, si në
të kremtet e mëdha. Më pas Shenjtëria e Tij kujtoi se sot fillon muaji i Majit kushtuar
Virgjërës Mari. Është një periudhë e përshtatshme për të zbuluar rolin amtar që luan
Zoja në jetën tonë – nënvizoi në vijim Ati i Shenjtë. “Ta mundim mosbesimin”,
që e provuan deri Apsotujt dhe “të besojmë në ngjalljen e Krishtit”: kjo është porosia
e Benediktit XVI i cili në lutjen e Mbretëreshës Qiellore nënvizoi se në Kohën e Pashkëve
liturgjia na nxit për ta përforcuar besimin tonë në Krishtin e Ngjallur. Prandaj kujtoi
edhe këto fjalë të Shën Palit: “Në se Krishti nuk është ngjallur, atëherë i kotë është
predikimi ynë e e kotë edhe feja jonë”. E kjo është një thirrje jashtzakonisht aktuale: “Ngjallja
e Krishtit është shenja qëndrore dalluese e krishterimit, e vërteta themelore, që
duhet ripohuar me forcë në çdo kohë, sepse ta mohosh, ashtu siç është provuar të bëhet
e vijon të provohet, ose ta shndërrosh në një ngjarje pastërtisht shpirtërore, do
të thotë ta bësh të kotë vetë fenë tonë”. Papa kujtoi se në ditët që pasuan
Ngjalljen e Zotit, Apostujt “rrinin gjithnjë bashkë, të ngushëlluar nga prania e Virgjërës
Mari”. Zoja – theksoi Ati i Shenjtë – ishte për ta nënë e mësuese, rol që vijon ta
luajë për të krishterët e të gjitha kohërave. E në Kohën e Pashkëve – vijoi Benedikti
XVI – e rijetojmë më thellësisht këtë përvojë e ndoshta pikërisht për këtë arsye tradita
popullore ia kushtoi Virgjërës Mari muajin e majit, që bie ndërmjet Pashkëve e Rrëshajëve.
Më pas Ati i Shenjtë reflektoi kështu mbi muajin e majit: “Ky muaj, që do ta
fillojmë nesër, është i nevojshëm për të rizbuluar rolin amtar të Zojës së Bekuar
në jetën tonë, që të jemi gjithnjë nxënës të urtë e dëshmitarë të guximshëm të Zotit
të ngjallur. Virgjërës Mari – vijoi Ati i Shenjtë – ia besojmë nevojat e Kishës
e të botës mbarë, posaçërisht në këtë çast të ngarkuar me të panjohura”. Benedikti
XVI foli edhe për Shën Jozefin, që Kisha katolike e kremtoi sot, duke kujtuar posaçërisht
botën e punës, Pajtor i së cilës është Shenjti. Pas lutjes së Mbretëreshës Qiellore,
Papa përshëndeti bashkësinë e Paraseminarit Shën Piu X në Vatikan, kushtuar shenjtërimit
të klerit, me rastin e 50-vjetorit të themelimit. Gjatë përshëndetjes në gjuhën angleze,
foli kryesisht për lumnimin në Indi të don Agostin Thevarparampil-it. Në përfundim
u kujtoi polakëve takimin në Poloni, ku do të shkojë në fund të majit, muajit kushtuar
devocionit marian. Të shumtë ishin dje në Shesh edhe grupet e italianëve, të cilëve
Papa u drejtoi fjalë plot përzemërsi. Ndërmjet tyre, Klubi automobilistik “Pasioni
i kuq”. Kishte sjellë në Sheshin e Shën Pjetrit dhjetra Ferrari, që dallohehsin mirë
ndërmjet turmës së pafund, për shkak të ngjyrës së tyre të kuqe flakë.