Në 2759-vjetorin e ditëlindjes së Qytetit të Amshuar, komuna e Romës dha një koncert
për nder të Benediktit XVI
( 2. 04. 06 R. V. ) Në përvjetorin
e 2759-të të ditëlindjes së Romës, administrata kapitoline dha sonte në Auditorin-Park
të Muzikës, një koncert për nder të Benediktit XVI, në praninë e Atit të Shenjtë
dhe të Presidentit të Republikës Italiane, Karlo Axelio Çampi. Qyteti i Amshuar
kremtoi sot ditëlindjen e vet të 2759-të. Me këtë rast komuna e kryeqytetit italian
dha një koncert për nder të Ipeshkvit të Romës, Benediktit XVI, që u kthye nga Kastel
Gandolfo, për të arritur pak para orës 18 në Auditorium, ku e prisnin autoritetet
më të larta të kryeqytetit si dhe presidenti i Republikës italiane, Çampi. “Bavaria
e Roma kanë pasur gjithnjë marrëdhënie të mira gjatë shekujsh. Ungjilli arriti në
Bavari pikërisht nga Roma”. Janë fjalët që u tha Papa Racinger bashkatdhatarëve të
tij, duke i pritur në audiencë në Vatikan, më 25 prill të vitit 2005, gjashtë ditë
pas zgjedhjes në papni. U shpjegonte kështu lidhjen e posaçme të tokës ku lindi, me
qytetin, ipeshkëv i të cilit është tani. Por, që para se të bëhej Pasardhës i Shën
Pjetrit, Kardinali Jozef Racinger mund të quhej bir i adoptuar i Romës, ku ka jetuar
23 vjet në krye të Kongregatës për Doktrinën e Fesë. Në Koncertin e sotëm, organizuar
nga Akademia Italiane e Shën Çeçiles, morën pjesë orkestra dhe kori, drejtuar nga
Mjeshtri Vladimir Jurovski dhe sopranoja Edita Gruberova, që luajtën pjesë të njohura
dhe arie nga krijimtaria e Volfang Amedeus Mozart. Ipeshkvi i Romës, dashuronjës
i madh i muzikës klasike, së cilës ia njeh rolin e jashtzakonshëm shpirtëror, shprehu
kënaqësinë e tij në një fjalim të shkurtër falënderimi në përfundim të Koncertit,
ndërsa pak përpara kishte ndjekur përshëndetjen e kryetarit të Bashkisë së Romës,
Valter Veltronit. Si falënderoi autoritetet e larta të pranishme dhe koncertistët,
Papa u ndal tek ditëlindja e Romës, që të kujton zanafillën e qytetit si dhe thirrjen
e tij për të qenë fanar i qytetërimit dhe i përshpirtërisë për mbarë botën. Falë takimit
të traditave të Romës dhe krishterimit – theksoi Benedikti XVI – Roma në rrjedhë shekujsh
kreu një mision të jashtzakonshëm e edhe sot vijon të jetë pikë e rëndësishme referimi
për mijëra shtegtarë, që tërhiqen nga pasuria e saj e pashoqe artistike, pjesa më
e madhe e së cilës lidhet ngusht me historinë e krishterë. “Koncerti i kësaj
mbrëmjeje jepet për të kujtuar kryevjetorin e Papnisë sime – tha Ati i Shenjtë,
dhe vijoi: Që prej një viti bashkësia katolike e Romës, pas vdekjes së të
dashurit e të paharruarit, Gjon Palit II, i është besuar nga Provania Hyjnore kujdesit
tim baritor. E unë e kam parë sa bujar e sa mikpritës është populli i Romës, që në
takimin e parë me besimtarët në Sheshin e Shën Pjetrit, mbrëmjen e 19 prillit të vitit
të kaluar e në shumë raste të tjera – vijoi Papa - dhe kujtoi me mirënjohje
të thellë turmën pa fund të besimtarëve që mblidhet çdo të dielë në Sheshin e Shën
Pjetrit, në zemër të Romës së krishterë, për t’u lutur së bashku me të”. Benedikti
XVI kujtoi më pas edhe 250-vjetorin e lindjes së Mozartit, i cili, së bashku me Beetovenin,
konsiderohet si ikonë e muzikës klasike, Vitin mozartian 2006, shumë të pasur me nisma
në përkujtim të kompozitorit gjenial dhe pjesët shumë të njohura që luajtën sonte
orkestra e kori. U ndalua sidomos tek “Ave verum”, që këndohet shpesh edhe në kremtimet
liturgjike, motèt tepër i pasur me teologji që të fton të lutesh. Kështu – vijoi Ati
i Shenjtë – muzika, duke e lartuar shpirtin e njeriut tek kundrimi, na ndihmon të
ndjejmë edhe dridhjet më intime të gjeniut njerëzor, në të cilin pasqyrohet sadopak
bukuria e pakrahasueshme e Krijuesit të Gjithësisë. Në përfundim, Ati i Shenjtë i
siguroi të pranishmit se do t’i kujtojë në lutje dhe u dha të gjithëve Bekimin e
tij apostolik.