Pashkët në Vatikan: Lutja e Papës për paqe në Afrikë, në Tokën Shenjte, në Irak e
Iran, në Mesazhin Urbi et Orbi – Romës e Botës të Papës Benedikti XVI, që kremtoi
Meshën solemne të Pashkëve në praninë e 100 mijë vetëve
(16. 04. 06 R.
V. )Në Meshën solemne të Pashkëve në Sheshin e Shën Pjetrit, Benedikti XVI i lartoi
Zotit një lutje universale për paqe, përballë 100 mijë besimtarëve e shtegtarëve.
Ati i Shenjtë kujtoi krizën në Tokën Shenjte, në Irak e në Afrikë si dhe tensionet
ndërkombëtare lidhur me armatimet bërthamore. “Zoti i ngjallur bëftë që të
ndjehet kudo forca e tij e jetës, e paqes dhe e lirisë”. Në ditën më të spikatur
të jetës e të vitit të krishterë, Benedikti XVI kryesoi Meshën e parë të Ditës së
Pashkëve të papnisë së Tij, duke ia besuar njerëzimin e Mijëvjeçarit të Tretë, Krishtit
të Ngjallur, me shpresën se do të gjejë në Të dritën për të zgjidhur konfliktet e
shumta – nga Lindja e Mesme në Afrikë – që akoma e pengojnë Planetin të gëzojë paqen
aq të dëshiruar. Mesazhi Urbi et Orbi – Romës e Botës – shqiptuar nga Papa prej lozhës
qëndrore të Bazilikës së Vatikanit, u ndoq nga njëqindmijë vetë të pranishëm në Sheshin
e Shën Pjetrit në Vatikan, ndërmjet të cilëve, shumë autoritete civile e ushtarake,
dhe nga qindra miliona telespektatorë të lidhur me kremtimin përmes televizionit.
T’i rijetojmë çastet më kulmore të këtij kremtimi solemn për Pashkët 2006. “Paqe
për Tokën Shenjte e për Irakun, për Afrikën e për Amerikën Latine. Paqe për botën
mbarë, që njerëzit e çdo etnie e besojme të përpiqen për ta mbrojtur vlerën e bashkëjetesës
paqësore, politike e fetare, shumë më tepër se sa përpiqen për luftën e terrorizmin”.
Duket sikur Benedikti XVI dëshiron t’ia besojë tingëllimit festiv të kambanave e të
këngëve, që i dhuruan, gjatë gjithë harkut të Meshës së Pashkëve, melodi e solemnitet
kumtimit të Ringjalljes - ‘Alelujën!’ e vet personale! Aleluja për një Planet i
cili ende, në vise të ndryshme – dymijë vjet pas lajmit të jashtzakonshëm të varrit
të zbrazët – vijon të provojë, për fat të keq, të kundërtën e fitores së amshuar
të Krishtit mbi vdekjen. Pikërisht në orën 10. 30, nën tingujt e fanfarës së
karabinierëve e pastaj të “Surrexit Dominus” – “Krishti u ngjall” - Benedikti XVI
u duk, në këmbë, në Sheshin e Shën Pjetrit, ndriçuar nga një diell i zbehtë e stërmbushur
nga një turmë e panumërt, prej më se njëqind mijë vetash. Një Shesh nga i cili telekamerat
e 102 emitenteve, lidhur drejtpërdrejtë me Mondovizion, ua transmetuan qindra mijëra
teleshikuesve në të katër anët e botës, Meshën dhe pamjen mahnitëse të tremes, kthyer
në lulishtë nga lulishtarët holandezë, të cilët që prej 21 vjetësh në Ditën e Pashkëve
e shndërrojnë Sheshin e Shën Pjetrit në kopsht të lulëzuar. Mijëra lule ngjyrosin
shkallët e bazilikës: tulipana, gjineshtra, viole, zymbyla e shumë lloje të tjera
lulesh, së bashku me drurë bajamesh e qershish në kulmin e lulëzimit. “Vdekja
e jeta u ndeshën në një duel të jashtëzakonshëm...”. Fjalët latine të Sekuencës, të
intonuara nga Kori i Kapelës Sikstine, i paraprinë Mesazhit të parë Urbi et Orbi –
Romës e Botës – të Benediktit XVI në përfundim të kremtimit eukaristik, sot kur Papa
kremtoi edhe 79-vjetorin e ditëlindjes. Benedikti XVI u duk, ashtu si një vit më parë
në çastin e zgjedhjes së Tij, në lozhën qëndrore të Bazilikës së Shën Pjetrit, prej
nga pohoi se “ngjarja vendimtare e Ringjalljes” mbetet gjithnjë aktuale, edhe në epokën
tonë plot trazira e pasiguri. Nga Krishti i ngjallur – shtoi Shenjtëria e Tij – nganjëherë
edhe pavetëdije, presin shpresën të gjithë ata që vijojnë të shtypen në peshën e padurueshme
të vuajtjes e të vdekjes. Duke filluar nga kontinenti afrikan: “Shpirti i të
Ngjallurit u sjelltë ngushëllim e siguri posaçërisht popullsive të Darfurit në Afrikë,
të cilat jetojnë në një situatë dramatike humanitare, që nuk mund të mbështetet më;
atyre të zonës së Liqeneve të Mëdha, ku shumë plagë janë endè të freskëta; popujve
të ndryshëm të Afrikës që dëshirojnë pajtim, drejtësi e zhvillim”. Nga Afrika
– në Irak, Benedikti XVI uroi që më në fund paqja të fitojë mbi dhunën tragjike që
vijon, pa pikë mëshire, të mbjellë viktima të reja. Më pas, Ati i Shenjtë kujtoi
Lindjen e Mesme, simbol gjaku e urrejtjeje deri tani të pashërueshme pikërisht në
viset ku shpresa e krishterë u bë histori: “Paqe uroj me gjithë shpirt edhe
për ata që përfshihen në konflikt në Tokën Shenjte. I ftuoj të gjithë në një dialog
durimtar e këmbëngulës, që siguron kapërcimin e pengesave të vjetra e të reja, duke
shmangur tundimet e raprezaljes e duke i edukuar breznitë e reja me respekt reciprok.
Uroj – vijoi Papa - që bashkësia ndërkombëtare, e cila ripohon të drejtën
e Izraelit për të jetuar në paqe, ta ndihmojë popullin palestinez t’i kapërcejë sa
më shpejt kushtet e pasigurta në të cilat jeton, e të ndërtojë ardhmërinë e vet, duke
shkuar drejt krijimit të një shteti të vërtetë”. Më pas Benedikti XVI e drejtoi
vështrimin nga vendet e Amerikës Latine, për të cilat uroi të përmirësohen kushtet
e jetës të miliona shtetasve, duke e çrrënjosur plagën e urryer të sekuestrimit të
njerëzve e duke i fuqizuar institucionet demokratike në frymën e harmonisë e të solidaritetit
të vërtetë. E më pas, një urim tjetër për paqen në atmosferën e ngjarjeve më aktuale
botërore: “Përsa i përket krizës ndërkombëtare lidhur me problemin bërthamor,
uroj të gjindet një rrugëzgjidhje e ndershme për të gjithë, përmes bisedimeve serioze
e të sinqerta e të forcohet, në vetëdijen e udhëheqësve ndërkombëtarë, vullneti për
të realizuar bashkëjetesën paqësore ndërmjet etnive, kulturave e feve, në mënyrë që
ta largojë kërcënimin e terrorizmit”. Në Sheshin e Shën Pjetrit, ku valëviteshin
flamujt e të gjitha kombeve e ku dallohej, falë ngjyrës së kuqe të gjakut e asaj të
zezë të shqiponjës, valëvitja e flamurit shqiptar, Benedikti XVI tha lutjen mariane
të Mbretëreshës Qiellore, duke i bërë urimet e Pashkëve mbarë Planetit në 62 gjuhë
e idioma – ndërmjet të cilave, urimi në gjuhën shqipe – me të cilin filluam emisionin
e sotëm, në gjuhën urdù, kineze, në gjuhën e maorëve e, natyrisht, në gjuhët më të
njohura me të cilat merret vesh gjithë bota, duke filluar nga italishtja.