U kthye në Shtëpinë e Atit më 28 mars Monsinjor Simeone Duka
( 30. 03. 06 R. V. ) Me hidhërim
e fe – siç shkruhet në ‘L’Osservatore Romano’ - njoftojmë se më 28 mars, në banesën
e tij në Romë, ndërroi jetë Monsinjor Simeone Duka, arbënesh nga Zara, i mirënjohur
për një veprimtari të jashtzakonshme në shërbim të Kishës në Itali, Kroaci e Shqipëri.
Prelati vdiq në moshën 90-vjeçare. Mesha e parë e salikimeve të Prelatit të
ndjerë, e kryesuar nga imzot Gjino Reali, u kremtua sot, në orën 10. 30 në katedralen
e La Stortës në Romë. Ishte i pranishëm edhe kryeredaktori i programit shqip të Radio
Vatikanit, Dom David Gjugja, i cili do ta shoqërojë Prelatin e ndjerë në shtegtimin
e fundmë drejt vendlindjes. Salikimet e fundit do të kremtohen nesër në Kishën e
salezianëve në Borgo Rico, ndërtuar nga i ndjeri e do të kryesohen nga imzot Ivan
Prendja. Më pas trupi i Monsinjor Dukës do të pushojë në paqe pranë familjarëve. Po
emri i tij nuk mund të harrohet: ai është i shkruar në ballin një numri të madh kishash
në Itali, Shqipëri e Kroaci. Besimtarët e shumtë që shtegtojnë në Kishën e Zojës së
Shkodrës, sigurisht e kanë lexuar këtë emër të shkruar në të majtën e Portës kryesore,
sepse falë bujarisë së tij u rindërtua Shenjtnorja Kombëtare e Zojës së Këshillit
të Mirë, Pajtores së shqiptarëve. Shtëpinë ku banonte në Romë, ia la trashëgim
Kongregatës për përhapjen e fesë, për ta përdorur në ndihmë të Kishës shqiptare. Është
për t’u kujtuar se ai nuk e harroi kurrë identitetin e tij shqiptar e prandaj bashkëpunoi
me të gjithë klerikët e laikët bashkëkombas që takoi, posaçërisht me Dom Zef Shestanin,
Dom Prenkë Ndrevashajn e Imzot Frano Illinë.