Takimet ndërmjet Papës e kardinajve, një rast i privilegjuar për t’i shërbyer më mirë
Kishës
(27. 03. 06 R.V.) Takimet e Papës me Kolegjin Kardinalor, një rast i privilegjuar
për t’i shërbyer më mirë Kishës: këtë theksoi Benedikti XVI në audiencën me kardinajtë
e rinj dhe familjarët e tyre.
Buzëqeshje e brohoritje në audiencën e sotme.
Tri ditë pas Koncistorit të tij të parë të zakonshëm publik, gjatë të cilit u dorëzoi
kapuçin dhe unazën kardinalore 15 kardinajve të rinj, sot paradite Benedikti XVI
u takua me kardinajtë e sapokrijuar dhe familjarët e tyre në Sallën e Palit VI në
Vatikan. Ishte takim ndërmjet miqsh, rrethuar nga ngrohtësia e familjarëve, pas
ditëve të jashtzakonshme të lartimit në dinjitetin kardinalor, por edhe një çast për
të ripohuar rëndësinë e bashkëpunimit të Kolegjit Kardinalor me Papën, në vijim të
takimit të 23 marsit të kaluar, një ditë para Koncistorit. Ati i Shenjtë i përshëndeti
përzemërsisht kardinajtë, të gjithë të shoqëruar nga familjarë, miq, dashamirë e besimtarë
të dioqezeve përkatëse. Prania e tyre – vërejti Papa në fjalimin e rastit – është
shprehje e dukshme e bashkimit të frytshëm që i jep gjallëri Kishës. Para Bekimit
Apostolik, Benedikti XVI u shprehu përsëri mirënjohjen e vet kardinajve të rinj e
u bëri një premtim: *** “Të dashur vëllezër, ju falënderoj përsëri për vizitën
tuaj! Duke ju përsëritur juve, zotërinj kardinaj, përshëndetjen time vëllazërore,
dëshiroj t’ju siguroj se do të vijoj t’ju shoqëroj me lutje. E di se mund të mbështetem
gjithnjë në bashkëpunimin tuaj, për të cilin e ndjej se kam nevojë. Takimet e mbarë
Kolegjit Kardinalor me Pasardhësin e Pjetrit, siç ndodhi të enjten e kaluar, do të
vijojnë të jenë raste të privilegjuara për të kërkuar bashkërisht t’i shërbejmë sa
më mirë Kishës, që Krishti ia besoi kujdesit tonë”.